Sý basý qaýpi bar avtojoldarda kúndelikti patrýldeý júrgizilip jatyr - mınıstr

NUR-SULTAN. QazAqparat – Sý tasqyny qaýpi bar óńirlerde avtojoldarda kúndelikti patrýldeý júrgizilip jatyr. Bul týraly QR Indýstrııa jáne ınfraqurylymdyq damý mınıstri Qaıyrbek Óskenbaev aıtty, dep habarlaıdy QazAqparat tilshisi.

«Avtomobıl jáne temir joldardaǵy sý tasqyny qaýpiniń aldyn alý ári joıý maqsatynda mınıstrlik ýaqtyly jáne qajetti sharalar qabyldaýda. Táýlik boıy kezekshilik uıymdastyrylyp, avtojoldar men jol qurylystaryn kúndelikti patrýldeý júrgizilip jatyr. Baqylaýda 278 qaýipti ýchaske, 52 kópir jáne 478 sý ótkizý qubyry bar, olarda 700- den astam jol-paıdalaný tehnıkasy bekitilgen», - dedi Q. Óskenbaev Senattyń jalpy otyrysynda.

Onyń aıtýynsha, sý tasqynyna qarsy jumystardy uıymdastyrý úshin materıaldardyń qajetti kólemi daıyndaldy.

Jalpy, sý tasqyny kezeńinen beri erigen qar sýynyń joldyń júrý bóliginen asyp ketýiniń 30 jaǵdaıy tirkeldi.

«Temirjoldar boıynsha toqtalsaq, poıyzdardyń úzdiksiz jáne qaýipsiz qozǵalysyn, joldy, jasandy qurylystardy ýaqtyly daıyndaýdy qamtamasyz etý maqsatynda «Qazaqstan temir joly» Ulttyq kompanııasy tıisti buıryǵyn bekitti. Onda sý tasqyny kezeńinde jol men jasandy qurylystardyń saqtalýy men turaqty jumysyn qamtamasyz etýge baǵyttalǵan uıymdastyrýshylyq-tehnıkalyq is-sharalar kózdelgen. Tasqyn sýlardy ótkizý boıynsha ótken jyldardyń tájirıbesin taldaýdan barlyq óńirler boıynsha 673 qaýipti orynnyń (qubyrlar, kópirler, jerjol) tizbesi aıqyndaldy», - dedi mınıstr.