Sý basqan óńirlerge 4 529 tonnadan astam gýmanıtarlyq kómek jetkizildi

<p>ASTANA. KAZINFORM - QR TJM resmı ókili Dınara Nurǵalıeva Respýblıkalyq aqparattyq shtabta ótken brıfıngte osy saǵattaǵy sý tasqyny jaǵdaıy týraly málemetterdi bólisti.</p>

Usynylǵan aqparatqa sáıkes, sý tasqyny bastalǵaly beri barlyǵy 118 116 adam, onyń ishinde 44 241 bala qutqarylyp, evakýatsııalandy. 19 656 adam óz úılerine oraldy. 113 852 aýyl sharýashylyq janýary qaýipsiz jerge aıdaldy. 8 850 adam, onyń ishinde 3 948 bala evakýatsııalaý pýnktterinde.

4 274 turǵyn úı men 2 719 aýla aýmaǵynan sýdyń baǵyty buryldy. 10,3 mln astam tekshe metr erigen qar sýy soryp shyǵaryldy, 3,3 mln qapshyq jáne 1,4 mln astam tonna ınertti materıal tóseldi.

Aqtóbe, Qostanaı, Aqmola, Atyraý, Soltústik Qazaqstan oblystarynda 6 009 jeke turǵyn úı, 1 109 aýla aýmaǵy sý astynda qalýda. 

«Avarııalyq-qutqarý jáne sý tasqynyna qarsy jumystarǵa 44 113 adam, 4 608 tehnıka, 858 sý sorý quraly, 339 júzý quraly, 16 áýe kemesi jumyldyryldy, sondaı-aq volonterler de belsendi qatysýda. Zardap shekken óńirlerge temirjol, avtomobıl kólikterimen jáne áýe kemelerimen 4 529-dan astam tonna gýmanıtarlyq kómek jetkizildi», - dedi TJM resmı ókili.