Sý basqan óńirlerde balalardyń oqýy qalaı uıymdastyrylyp jatyr

<p>ASTANA. KAZINFORM &ndash; Jedel ári sońǵy aqparatqa sáıkes, topan sý basqan óńirlerde 80 bilim berý uıymy onlaın oqý formatqa kóshti. Sonymen qatar balalarǵa psıhologııalyq kómek kórsetilýde. Bul týraly Oqý-aǵartý mınıstrliginiń resmı ókili Mereke Amangeldiqyzy málim etti.&nbsp;</p>

«Oqý-aǵartý mınıstrligi óńirlerdegi jaǵdaıǵa turaqty túrde monıtorıng jáne úılestirý jumystaryn júrgizip otyr. Mınıstrlik ókilderi respýblıkalyq jáne óńirlik jedel shtabtardyń quramynda jumys jasaýda. Jedel aqparatqa sáıkes, búginde 80 bilim berý uıymdarynda oqý onlaın formatynda júrgizilýde. Onyń ishinde 55 mektep evakýatsııalyq pýnkt bolyp aıqyndalǵan. Bul mektepterdegi bala sany – 7255», - dedi atalǵan mınıstrliktiń resmı ókili Mereke Amangeldiqyzy Ortalyq kommýnıkatsııalar qyzmeti alańynda ótken baspasóz máslıhatynda.

Resmı ókildiń aıtýynsha, balalarǵa jáne zardap shekkenderge psıhologııalyq kómek kórsetý maqsatynda jergilikti jerlerde 300-den astam mektep psıhology jumysqa kirisip ketti. 

«Bala quqyqtary jónindegi ýákilderi jumysqa belsendi aralasýda. Zardap shekken eldi meken balalary oqý quraldarymen, onlaın oqytý úshin qajetti tehnıkalyq quraldarmen qamtamasyz etildi», - deıdi ol.

Eske sala keteıik, buǵan deıin Batys Qazaqstan oblysynda 10 eldi meken kólik qatynasynsyz qalǵanyn jazǵan bolatynbyz.