Sý basqan óńirlerde 115 myń oqýshy qashyqtan bilim alýǵa májbúr

<p>ASTANA. KAZINFORM — Sý tasqynynan zardap shekken óńirlerdegi balalarǵa «Daryn» jáne NZM mektep-ınternattarynda oqý protsesi qamtamasyz etiledi. Bul jaıynda Úkimetitń baspasóz qyzmeti habarlady. </p>

Úkimette sý tasqyny jaǵdaıyna baılanysty evakýatsııalyq ortalyqtarǵa ornalastyrylǵan balalarmen jumys isteý algorıtmi jasaldy.

Premer-Mınıstr Oljas Bektenovtiń tóraǵalyǵymen ótken respýblıkalyq shtab otyrysynda vıtse-premer Tamara Dúısenova mehanızmder týraly tolyǵyraq aıtyp berdi.

Qazir 115 myń oqýshy bilim alatyn 130 qazaqstandyq mektepte oqý protsesi qashyqtan júrip jatyr.

Evakýatsııa ortalyǵyndaǵy balalar bylaı bólingen:

— Bastaýysh synyp oqýshylary (1-4 synyptar) (207 bala ata-anasymen birge) oqý protsesin tolyq uıymdastyra otyryp, saýyqtyrý ortalyqtaryna (lagerlerde) ornalastyrylady.

— 5-8 synyp oqýshylary (1 577 bala) «Daryn», BIL, NZM mektep ınternattaryna ornalastyrylady.

— Joǵary synyp oqýshylary (9-11 synyptar) (213 bala) kolledjder men joǵary oqý oryndaryna ýaqytsha ornalastyrylady.

Vıtse-premer mindet — sý tasqyny jáne qalpyna keltirý jumystary aıaqtalǵanǵa deıin balalardy oqýmen jáne jazǵy demalyspen qamtamasyz etý ekenin atap ótti.

«Algorıtm ázirlendi, ony jumaǵa deıin ákimdikterge jetkizemiz. Bul jumysqa kásipodaqtardy, jeke menshik lagerler men mektepterdi, tegin jol júrýdi qamtamasyz etýde QTJ-ny, JOO oqytýshylaryn qosamyz. Jalpyǵa birdeı bilim berý qory aıasynda balalar barlyq qajetti kerek-jaraqtarmen qamtamasyz etiletin bolady. Mektep psıhologtarynyń jumysy da uıymdastyrylǵan», — dedi Tamara Dúısenova.