Sý basqan Qulsarydaǵy aýrýhanadan 77 naýqasty Mańǵystaý oblysyna aparady

<p>ATYRAÝ. KAZINFORM &ndash; Qulsarydaǵy aýrýhanadan 77 naýqasty Beıneýdegi emdeý ornyna evakýatsııalaý bastaldy.</p>

Jylyoı aýdandyq ortalyq aýrýhananyń bas dárigeri Asulan Abdrahmanovtyń aıtýynsha, emdelýshilerdiń qaýipsizdigin qamtamasyz etý kózdelgen.

Bul úshin 14 jedel járdem jáne 2 avtobýs bólingen. 

Foto: Atyraý oblysy ákimdigi

«Ortalyq aýrýhanada em alyp jatqan 77 naýqas bar. Naýsqastardyń qaýipsizdigin qamtamasyz etý maqsatynda kórshiles oblysqa tasymaldap jatyrmyz. Aýrýhananyń jansaqtaý bóliminde 2, hırýrgııa bóliminde 12, terapııa bóliminde 10, balalar jáne bosaný bóliminde de naýqastar bar. Olardy qaýipsiz orynǵa kóshirý maqsatynda evakýatsııa júrip jatyr. Jaǵdaıy aýyr naýqastar reanımatologpen, anestezıologpen jáne tolyq jabdyqtalǵan IVL apparatymen barady. Jatyp baratyn naýqastar jedel járdem kóligimen, ózgeleri avtobýspen qatynaıdy», -dedi Asulan Abdrahmanov.

Naýqastardy emdeýshi dárigerler alyp barady. Olar dári-dármektiń barlyq túrimen qamtyldy.

Qyzmetkerler Beıneý aýdandyq aýrýhanasyna barǵan soń emdeý-saýyqtyrý jumysyna kómektesedi. Jalaqysy issapar aqysy negizinde tólenedi.

Al aýdandyq aýrýhana jaǵdaı turaqtalǵanǵa deıin tek alǵashqy kómek kórsete beredi.

Foto: Atyraý oblysy ákimdigi

Eske sala ketelik, buǵan deıin tasqyn sý Atyraý oblysyndaǵy Qulsary qalasyna kire bastaǵanyn jazǵan edik.

Qulsary qalasynda 2 500 úıdi tasqyn sý basyp, 4000 adam, onyń ishinde 1 myńnan astam bala kóshirildi.

Qulsaryda ákimdik, áleýmettik nysandar men ortalyq stadıon sý astynda qaldy.

Sondaı-aq, Qulsaryda ómirge kelgen egiz ul Beıneý aýrýhanasyna jetkizildi.