Sý basqan aımaqtardan 112,5 myń mal evakýatsııalandy

<p>ASTANA. KAZINFORM &ndash; Sý tasqyny saldarynan qyrylǵan mal sany 7 myńnan asty. Bul týraly QR Aýyl sharýashylyǵy mınıstrliginiń resmı ókili Oljas Tilebaldın aıtyp berdi.</p>

«Qabyldanyp jatqan sharalar nátıjesinde sý basý aımaqtarynan qaýipsiz ýchaskelerge 112,5 myń bas mal evakýatsııalandy. Ólgen mal basy boıynsha derekter únemi jańartylyp otyrady, búgingi tańda 7 035 mal týshasy anyqtaldy, olardyń basym bóligi usaq mal», - dedi spıker Respýblıkalyq aqparattyq shtabta ótken brıfıngide.

Respýblıkalyq epızootııaǵa qarsy otrıad oblys ákimdikterimen birlesip, ólgen mal-janýardy jınaý jáne joıý jumystaryn jalǵastyrýda.

«Eske salaıyq, topyraqta sibir jarasy sporasynyń bolýyna júrgizilgen taldaý teris nátıje kórsetti. Búgingi kúni sý basqan aımaqtardaǵy epızootııalyq jaǵdaı turaqty jáne Aýyl sharýashylyǵy mınıstrliginiń baqylaýynda», - dep eske saldy O.Tilebaldın.

Sondaı-aq, sý tasqynyna qarsy is-qımyl jónindegi respýblıkalyq shtab hattamasymen ólgen mal qunyn óteý algorıtmi bekitildi.

Atalǵan algorıtmge sáıkes sý tasqyny saldarynan ólgen aýyl sharýashylyǵy janýarlarynyń barlyq ıeleri ótemaqy alýǵa quqyly.