Sý basqan Astana IT University ókilderi jaǵdaıǵa qatysty túsinikteme berdi

NUR-SULTAN. QazAqparat – Búgingi nóserden ǵımaratyn sý basqan elordadaǵy «Astana IT University» ókilderi jaǵdaıǵa qatysty túsinikteme berdi. QazAqparat tilshisiniń saýalyna jaýap bergen oqý orynnyń baspasóz qyzmeti áleýmettik jelilerde taraǵan vıdeodaǵy sý basqan nysannyń ýnıversıtetke tıesili ekenin rastady.

«Qazirgi ýaqytta oqý orny «QazExpoCongress» AQ-ǵa tıesili ǵımarattyń bir bóliginde ornalasqan. Vıdeoda kórsetilgen aýdıtorııa - ýnıversıtettiń áskerı kafedrasy. Ol oryn stýdentterdi oqytýǵa arnalmaǵan. Oǵan qosa, kanıkýlǵa baılanysty qazir ýnıversıtette sabaqtar ótkizilmeıdi. Búginde oqý orny men «QazExpoCongress» birlesip, sý basqan jerlerdi qalypyna keltirý boıynsha jumystar júrgizip jatyr «, - dep málim etti ýnıversıtettiń baspasóz qyzmeti tilshi saýalyna oraı.

Ýnıversıtet jańa oqý jyly bastalǵanǵa deıin qalpyna keltirý jumystaryn aıaqtap, stýdentterdi qabyldaıtynyn jetkizdi.

Aıta keteıik, búgin tolassyz jaýǵan jańbyr saldarynan elordanyń EXPO aýdanyndaǵy birneshe ǵımaratty sý basyp qalǵan edi. Olardyń arasynda «Hilton Astana» qonaq úıi de bar.

Vıdeodan alynǵan kadr