Stýdenttik jataqhanalar ýnıversıtetimiz úshin qýanyshty bastama - Tilektes Espolov

ALMATY. QazAqparat - Qazaq ulttyq agrarlyq ýnıversıtetiniń rektory, UǴA akademıgi Tilektes Espolov «Prezıdenttiń bes áleýmettik bastamasy» atty úndeýi eldiń áleýetin kóteretin tarıhı qadam ekenin aıtty, dep habarlaıdy QazAqparat tilshisi.

Akademık Tilektes Espolov Úndeýde aıtylǵan stýdenttik jataqhanalardy salý 99 paıyz aýyl balalary bilim alatyn ýnıversıtet úshin qýana qabyldaıtyn bastama ekenin aıtty.

«Úndeýde Memleket basshysy memlekettik-jekemenshik seriktestiktiń qatysýymen 75 myń orynǵa arnalǵan stýdenttik jataqhanalardy 2020 jylǵa deıin salýdy josparlaǵanyn atap ótti. Bul rette Bilim jáne ǵylym mınıstrligi jataqhana qurylysyna baǵyttalǵan ınvestıtsııa bóligin birte-birte qaıtarýǵa kepil beredi. Bul, ásirese 99% aýyl balalary bilim alatyn bizdiń ýnıversıtetimiz úshin qýana qabyldaıtyn jańa bastama bolǵany anyq. Búgingi tańda ýnıversıtetimizde jataqhanaǵa muqtaj stýdentterdiń 40% ǵana jatyn oryndarmen qamtamasyz etilgen. Eseptik kórsetkishter boıynsha stýdentter jáne jas ǵalymdardy jataqhanamen tolyq qamtamasyz etý úshin qosymsha 27 myń sharshy metr qajet.

Ýnıversıtet oqytýshylarynyń kóp bóligin jas ǵalymdar quraıdy. Olardyń kópshiligi baspanamen qamtamasyz etilmegen. Elbasy úndeýindegi árbir otbasyna baspana alýdyń jańa múmkindikterin berýge qatysty birinshi bastamasy ásirese jas otbasylardyń baspanaly bolýy úshin jasalyp otyrǵan ońtaıly qadam ekenin atap ótýimiz kerek. Elbasy usynǵan áleýmettik mańyzy bar «7-20-25» baǵdarlamasy halyqty turǵyn úımen qamtamasyz etýdiń eń tıimdi tetigi dep esepteýimiz kerek. Memleket basshysy atap ótkendeı: «Nesıe ósiminiń mólsherlemesi qazirgideı 14-16% emes, jylyna 7% aspaıtyn bolady, al bastapqy jarna baspana qunynyń 20% aspaýǵa tıis».

Memleketke ózgeris pen jańalyqty ákeletin - ozyq bilim men ınnovatsııalyq ǵylym. Bilim mekemeleriniń túlekteri jańa formattaǵy el ekonomıkasynyń temirqazyǵyna aınalýy tıis. Aýyldan shyqqan jastar bilim alatyn ýnıversıtet túlekteriniń basym bóligi búginde aýyl zııalylary kontıngentin qalyptastyrýǵa negiz bolyp, elimizdiń túkpir-túkpirinde eńbekke belsene aralasyp, elge qyzmet etýde. Bizdiń maqsatymyz - aýyl-aýyldardan kelgen stýdentterimizge tıisti bilim berip qana qoımaı, olardy El men Jerdiń qasıetin baǵalaıtyn Ult zııalysyna aınalatyn tulǵa retinde qalyptastyrý. Sondyqtan, El Prezıdenti N.Á.Nazarbaevtyń joǵaryda atalǵan bastamalary mindetti túrde Táýelsiz Qazaqstannyń jańa zaman talaptaryna saı áleýmettik-ekonomıkalyq damýyna jańa serpin bereri sózsiz», - dedi akademık.