Stýdenttik jataqhana salý jumystary bıyl bastalady

ASTANA. QazAqparat - Stýdentterge arnalǵan 75 myń oryndyq  jataqhana salý jumystary bıyl bastalýy múmkin. Bul týraly búgin QR Prezıdenti Nursultan Nazarbaevtyń 5 áleýmettik bastamasyna oraı pikir bildirgen QR Bilim jáne ǵylym mınıstri Erlan Saǵadıev aıtty, dep habarlaıdy QazAqparat.

Onyń sózine qaraǵanda, stýdentterge jataqhana salý isin jergilikti ákimdikter, joǵary oqý oryndary, jeke kompanııalar  birlesip sheshedi. Biraq, jeke kompanııalar jataqhanany salǵannan keıin olardyń jumsaǵan qarajatyn qaıtaryp berý tetigi ázirlenýi tıis. Bul tetikti aldaǵy ýaqytta  Úkimet daıyndaıtyn bolady.

«Joǵary oqý orny jataqhana salatyn bolsa, onda memleket belgili bir ýaqyttyń ishinde oǵan jumsalǵan qarajatty qaıtaryp beredi. Atalǵan qarajat respýblıkalyq bıýdjetten qarastyrylatyn bolady. Bul jumystardy bıyl bastaýǵa bolady.  5 jyldyń ishinde 75 myń oryndyq jataqhana salýymyz kerek. Josparyn jasap Úkimet qaraýyna engizetin bolamyz», - dedi mınıstr.

Sonymen qatar ol Prezıdent bilim granttaryn 20 myńǵa arttyrý týraly tapsyrma bergenin atap ótti.

«Óte qýanyshtymyz. Onyń 11 myńy tehnıkalyq mamandyqtarǵa beriledi. Onyń ishinde bakalavrıatýra, magıstratýra, doktorantýra da bolady. Bárin qarastyramyz, joba retinde Úkimet otyrysyna engizetin bolamyz», - dedi Erlan Saǵadıev.