Stýdentterge ekstremızm men terrorızmniń qaýpi túsindirildi

ALMATY. QazAqparat – Almatyda Rýzýddınov atyndaǵy medıtsınalyq stomatologııalyq kolledji stýdentterine dinı ekstremızmdi aldyn alý sharalary týraly aıtyldy, dep habarlaıdy QazAqparat tilshisi.

Aqparattyq toptyń túsindirý múshesi, dintanýshy Meımanqoja Nurmuhammed stýdentterge jat aǵymdardan keletin qaýip týraly túsindire otyryp, dinı ekstremızm men terrorızmge qarsy júrgizilip jatqan memlekettik saıasat týraly aıtty.

Onyń aıtýynsha, 2011-2019 jyldar aralyǵynda dinı ekstremızmge baılanysty 1000-ǵa jýyq adam qylmys jasaǵan. Onyń ishinde 32 adam qazir temir tordyń ar jaǵynda jazasyn ótep jatyr.

Sonymen qatar, lektor adamdardyń dástúrli kózqarastan qalaısha destrýktıvti aǵymǵa aýyp ketetinin túsindirdi.

«Adamdar qazir dindi syrtqy formasynda qabyldaı bastaǵan. Al bizdiń ata-babamyz dindi júrekpen qabyldaǵan. Onyń bári bizdiń ádebıetimizden, salt dástúrimizden kórinis tabady. Salt dástúrimizde izgi ıdeıalar, rýhanı qundylyqtar saqtalǵan. Qyzdardyń sálem salǵany, betashary, úlkenge - qurmet, kishige - izet degen degen baýyrmashyldyqtyń bolýy, týǵan-týys arasyndaǵy qatynas. Munyń barlyǵy dinmen bite qaınasqan qundylyqtarymyz. Týǵan jerimizdi, tilimizdi, tarıhymyzdy syılaýdy dinge qarama-qaıshy keltirýge bolmaıdy. Sebebi bizdiń dástúrlerimizdiń ishinde dinı qundylyqtar bar. Ony bólek shyǵarýǵa qaraýǵa bolmaıdy. Rýhanı qundylyqtarymyz úndes. Al destrýktıvti dindegiler bul ulttyq qundylyqtarymyzdy moıyndamaıdy. Sodan baryp adasqanyn bilmeı qalady», - dedi Nurmuhammed Meımanqoja.

Aıta ketý kerek, mundaı túsindirý jumystary qazir Almaty qalasynyń kóp oryndarynda ótip jatyr. Lektor Qazaqstan Respýblıkasynyń 2017-2020 jyldarǵa arnalǵan din salasyndaǵy memlekettik saıasaty týraly aıtyp berdi.

Kezdesý barysynda stýdentter ózderin qyzyqtyrǵan saýaldarǵa naqty jaýap aldy.