Stýdentterdiń jazǵy ýnıversıadasy: sport túrleriniń jartysynan astamy qysqardy
Elimizdiń joǵary oqý oryndary stýdentteriniń HІІ jazǵy ýnıversıadasy 24 mamyr men 24 maýsym aralyǵynda uıymdastyrylady. Bul jolǵy ýnıversıada baǵdarlamasyna birqatar ózgertý engizilgen. Atap aıtsaq, sport túrleriniń sany 30-dan 17-ge deıin qysqartyldy. Bul rette sportshy stýdentterdiń qabilet-qarymy men sport túrlerine beıini eskerilip, dúnıejúzilik ýnıversıada baǵdarlamasyna basymdyq berilgen.
Sondaı-aq, sporttyq saıystar túgeldeı Aqtaý qalasy aýmaǵynda ótedi. Aıta ketsek, buryn birneshe qalada uıymdastyrylatyn.
«Sambo, grek-rım kúresi, dzıýdo, erkin kúres, jeńil atletıka boıynsha saıys «Mańǵystaý Arena» sport kesheninde ótedi dep josparlanǵan. Al, basketbol, voleıbol, fýtzal men boks, tennıs jáne badmınton sport túrleri boıynsha «Halyq Arena» sport saraıynda saıysqa tússe, «Arystan-Arena» kesheninde stýdentter júzý sportynan jarysady. Qalǵan sport túrleri «Yessenov Sport Club» stýdenttik kesheninde ótedi», - delingen óńirlik kommýnıkatsııalar ortalyǵy taratqan málimette.
«Aqtau-2023» ýnıversıadasynyń ashylý saltanaty 5 maýsymda «Munaıshy» stadıonynda, al jabylý saltanaty 24 maýsymda «Mańǵystaý Arena» sport kesheninde uıymdastyrylady. Aýqymdy is-shara Ǵylym jáne joǵary bilim mınıstrliginiń, Yessenov University-diń qoldaýymen ótkiziledi.