Stýdentterdiń bilimin baǵalaý tásili ózgeredi - Saıasat Nurbek

NUR-SULTAN. QazAqparat – Stýdentterge baǵa qoıý kezinde onyń akademııalyq bilimimen birge áleýmettik jáne zertteý belsendiligin eskeretin pılottyq joba qolǵa alynady, dep habarlaıdy QazAqparat tilshisi.

Úkimet otyrsynda Ǵylym jáne joǵary bilim mınıstri Saıasat Nurbek osyndaı málimet berdi.

«Eńbek naryǵyn joǵary bilim deńgeıinde tájirıbeli mamandarmen qamtamasyz etý jáne olardy mobıldi daıarlaý úshin qoldanbaly bakalavrıat modeli engizildi. Osy jyldyń qyrkúıek aıynan bastap pılottyq rejımde 8 joǵary oqý ornynyń bazasynda jańa baǵdarlamalar iske qosylady.

Sondaı-aq, 4 joǵary oqý ornynyń bazasynda pılottyq rejımde stýdentterdiń áleýmettik jáne zertteý belsendiligin eskeretin bilim alýshylardy baǵalaýdyń jańa modeli, ıaǵnı ıntegraldyq GPA pılottyq jobasyn bastap jatyrmyz. Endi stýdentterdi baǵalaý kezinde tek akademııalyq kórsetkishter emes, zertteýlerge, volonterlik, debattyq qozǵalystarǵa qatysýy da eskeriledi», - dedi mınıstr.

Onyń aıtýynsha, tamyzdyń sońynda joǵary bilim berý salasynyń ókilderi derbes Tamyz konferentsııasyn ótkizbek.

«Tórtinshiden, joǵary oqý oryndary akademııalyq protseske daıyndyqty qamtamasyz etý jónindegi jumysty aıaqtady. Rektorlarmen úsh úlken kezdesý ótkizdik. Bilim berý baǵdarlamalaryn oqý-ádistemelik qamtamasyz etý, kesteni bekitý, pedagogıkalyq júktemeni anyqtaý, oqytýshy-professorlyq quramnyń biliktiligin arttyrýdy qamtamasyz etý jumystary atqaryldy.

24-25 tamyzda Tamyz konferentsııasyn ótkizemiz. Forým aıasynda forsaıt-sessııalar men birqatar semınarlar uıymdastyrylady», - dedi vedomstvo basshysy.

Buǵan deıin JOO praktık-mamandar men top-menedjerlerdi stýdentter men magıstranttardyń dıplomdyq jáne zertteý jumystaryna jetekshilik etýge tarta alatyny aıtyldy.