Stýdentter jataqhanasyna muqtaj úsh óńir belgili boldy
«Birinshiden, biz joǵary oqý oryndarymen, kolledjdermen, jergilikti atqarýshy organdarmen birlesip, jataqhanalardaǵy qajetti oryndardy anyqtadyq. Búgingi kúni óńirlik shekte alyp qaraıtyn bolsaq, Almatyǵa 23 myń, Astanaǵa 17 myń jáne Ońtústik Qazaqstan oblysyna 11 myń jataqhana orny qajet. Ekinshiden, jergilikti atqarýshy organdarmen jataqhana salýǵa arnalǵan jer telimderin anyqtaý jumystary júrgizildi. Qazirgi ýaqytta ákimdikter oqý ornynyń janynda ornalasqan jáne bilim berý uıymdaryna taqaý aımaqtan shamamen 134 jer ýchaskesin bóldi», - dedi vıtse-mınıstr.
Onyń aıtýynsha, jataqhana salý tetikteri ázirlengen. Aldymen jataqhananyń jobasy ázirlenip, QR Bilim jáne ǵylym mınıstrliginiń Qarjy ortalyǵy men bank arasynda kelisimshart jasalady. Odan keıin joǵary oqý orny nemese qurylysshy kompanııa bankten zaım alady.
«Jataqhana paıdalanýǵa berilgennen keıin ol memleket tarapynan ótemaqy tólemin alatyn bolady. Ótemaqy tóleýdiń merzimi shamamen 8 jyldy quraıdy. 8 jyl boıy memleket oǵan bir tósek orynǵa ketken barlyq ınvestıtsııalyq shyǵyndaryn óteıdi. Biz bul tetikti eseptep shyǵyp, Qarjy mınıstrligimen birge bekittik. Joǵary oqý oryndarymen de talqyladyq», - dedi ol.
Aıta keteıik, Elbasy Nursultan Nazarbaevtyń 5 áleýmettik bastamasy aıasynda elimizdiń óńirlerinde stýdenterge arnalǵan 75 myń oryndyq jataqhana salynatyn bolady.