Stýdentter jataqhanalardy ózderi salady

ASTANA. QazAqparat - QR Prezıdenti Nursultan Nazarbaevtyń bastamasymen salynatyn 75 myń oryndyq jataqhana qurylysyna stýdentter de tartylady. Bul týraly búgin QR Din isteri jáne azamattyq qoǵam vıtse-mınıstri Abzal Núkenov aıtty, dep habarlaıdy QazAqparat.

«Elbasynyń 5 áleýmettik bastamasyna baılanysty búgin birqatar kezdesý ótkizdik. Túske deıin sarapshylarmen kezdesip, aqyldastyq. Sebebi Memleket basshysy bul bastamalardy júzege asyrý barysynda halyqpen keń talqylaýdy tapsyrǵan bolatyn. Talqylaý barysynda bul úrdiske jastardy keńinen tartý máselesine aıryqsha nazar aýdardyq. Óıtkeni, jataqhanalardy jastardyń ózderi-aq sala alady. Sol arqyly bir jaǵynan jastardy jumyspen qamtysaq, ekinshi jaǵynan jataqhanalardy salý barysynda jastarmen aqyldasa otyryp, ony barynsha qolaıly jasar edik. Buǵan qosa, jastar tabys ta tabady», - dedi vıtse-mınıstr S.Seıfýllın atyndaǵy agrotehnıkalyq ýnıversıtette ótken Qazaqstan jastary forýmy barysynda.

Onyń aıtýynsha, qazir elimizdiń árbir aımaǵynda «Jasyl el» jasaqtary bar. Máselen, byltyr atalǵan uıymnyń 24 myńnan astam jasy jumys istedi. Munan bólek, kóptegen aımaqtarda qurylys otrıadtary jasaqtalǵan.

«Olardyń barlyǵy da jumys isteýge daıyn dep oılaımyn. Sondyqtan ol jastardy jumysqa tartqannan eshim utylmaıdy. Qaıta jastardyń ózderi utady. Ózderi turatyn bolǵannan keıin jataqhanalar da sapaly salynady», - dedi vıtse-mınıstr.

Sonymen qatar ol sarapshylar keńesi barysynda bilim granttaryn jumysshy mamandyqtary tapshy aımaqtarǵa kóbirek bólý jaıynda da usynystar bolǵanyn atap ótti.

«Biz bul usynystardy jınaqtap, tıisti memlekettik organdarǵa, jergilikti ákimshilikterge taratamyz. Taǵy bir mańyzdy másele keshe Elbasy bul jumystarǵa monıtorıng jasaýǵa «Nur Otan» partııasyn tartý kerek dep aıtty. Osy jumystarǵa jastardy, jastar uıymdaryn keńinen tartsaq, nátıjesi oń bolatyndyǵyna senimdimin», - dedi Abzal Núrkenov.