Stýdentter proktorıng júıesinde emtıhan tapsyrýǵa daıyn

NUR-SULTAN. QazAqparat – Stýdentterdiń bilimin tekserý jáne bilim sapasyn qamtamasyz etý úshin kóptegen joǵary oqý ornyna proktorıng júıesi engizilip otyr. Bul týraly Ortalyq kommýnıkatsııalar qyzmetinde ótken onlaın brıfıngte BǴM Joǵary jáne joǵary oqý ornynan keıingi bilim departamenti dırektorynyń orynbasary Baný Narbekova aıtty, dep habarlaıdy QazAqparat tilshisi.

«Pandemııa bastalǵaly, kúzgi semestrden bastap mınıstrlik tarapynan birqatar ádisnamalyq nusqa, normatıvtik-quqyqtyq aktiler jasaldy. Kóptegen is-shara aıasynda biz tikeleı joǵary oqý oryndarymen jumys isteýdemiz. Búgingi tańda joǵary oqý oryndarynyń 95% stýdentterdi qashyqtan oqytsa, 5% aralas, ıaǵnı onlaın, oflaın formatta oqyp jatyr. Stýdentter pedagogıka, gýmanıtarlyq, ІT mamandyqtary boıynsha qashyqtan oqysa, medıtsına, aýyl sharýashylyǵy, tehnıka, qurylys baǵytynda aralas formatta bilim alyp júr», - deıdi BǴM Joǵary jáne joǵary oqý ornynan keıingi bilim departamenti dırektorynyń orynbasary Baný Narbekova.

Onyń aıtýynsha, joǵary oqý oryndaryna tehnıkalyq jabdyqtaý ǵana emes, ınfraqurylym men bilim platformasyn uıymdastyrý úshin qarajat kózi qajet boldy.

«Qarajat kózi tikeleı joǵary oqý oryndary tarapynan bólindi. Qysqy sessııaǵa daıyndyq barysynda tikeleı kontent, onyń ishinde elektrondy lektsııalarǵa, vıdeolektsııalarǵa, sessııaǵa daıyndyq barysynda testileý júrgizýge qatysty stýdenttermen de birneshe vebınar, trenıng júrgizdi. Stýdentterdiń bilimin tekserý jáne bilim sapasyn qamtamasyz etý úshin kóptegen joǵary oqý ornyna proktorıng júıesi engizilip otyr. Onyń birneshe deńgeıi bar, stýdentter sol deńgeıler negizinde emtıhan tapsyrýǵa daıyn»,- deıdi ol.