Stýdentter endi synaq kitapshasyn ustap júrmeıdi

NUR-SULTAN. QazAqparat - Bilim jáne ǵylym mınıstrligi joǵary oqý oryndarynan talap etiletin birqatar qujattyń qysqarǵanyn málimdedi, dep habarlaıdy QazAqparat tilshisi.

Vedomstvonyń joǵary jáne joǵary oqý ornynan keıingi bilim departamentiniń dırektory Ádilet Toıbaevtyń aıtýynsha, budan bylaı joǵary oqý oryndarynda eseptilikti qysqartý aıasynda 11 qujat talap etilmeıdi. Sonyń ishinde stýdenttiń synaq kitapshasy jáne úlgerimniń qaǵaz jýrnaldary bar.

Sonymen birge professor-oqytýshylar quramynyń jumysyn jeńildetý maqsatynda birneshe esep berý qujaty alynyp tastaldy. Mınıstrlik kúshi joıylǵan eseptiliktiń jeke qaǵaz túrlerin jasamaýǵa, josparlaý men qujat aınalymynyń tsıfrlyq júıesine tolyq kóshýge shaqyrdy. «Alaıda departamentke keıbir joǵary oqý oryndarynda áli kúnge deıin professor-oqytýshylar quramynan artyq eseptilik qujattary talap etiletini týraly aqparat kelip túsip jatyr. Mysaly, stýdentter úlgeriminiń qaǵaz jýrnaly, professor-oqytýshylar quramynyń atqarǵan jumystary týraly apta, aı saıynǵy esepter jáne taǵysyn taǵy. Qurmetti áriptester, eger siz osyndaı problemalarǵa tap bolsańyz departamentke habarlaýyńyzdy suraımyz», — dep jazdy Ádilet Toıbaev áleýmettik jelidegi paraqshasyna.