«Stýdent qalashyqtary salynady» - baspasózge sholý
* * *
«Egemen Qazaqstan» basylymynyń búgingi sanynda «Maskúnemder tiziminde «óli jandar» da júr» degen materıal berilgen. «Qoldaǵy derekterge kóz júgirte otyryp, araq dese aryn da, baryn da satatyn soltústik óńirdegi maskúnemderdiń sany kemý qaıda deısiń. Aldyn aıpar, janyn jaıpar qyzyl tili sýmańdaǵan órt sekildi órship barady. Máselen, byltyr «aqańdy» kórse boldy tórkinin saǵynǵan kelinshekteı eki kózi botalap qoıa beretin 8678 ishkish tirkeýge alynsa, bıylǵy jyldyń 5 aıynda olardyń sany 7 myńnan asyp jyǵylǵan. Al, úıinen de, kúıinen de aıyrylyp, usharyn jel, qonaryn saı biletin 82 taza maskúnem narkologııalyq ortalyqqa toǵytylǵan»,-dep jazady gazet. Oblystyq quqyq qorǵaý organdarynyń úılestirý keńesine qatysýshylar jaǵdaıdyń alańdatarlyq shekke jetkenin, bulaı jalǵasa berse, onyń sońy úlken qasiretke aınalatynyn jasyrmady. Óńirdegi árbir segizinshi qylmys ishimdik saldarynan jasalsa, 2012 jyly bul kórsetkishtiń 55 paıyzǵa artýy oılandyrmaı qoımaıdy.
Osy basylymda Qazaqstan Respýblıkasy Ortalyq saılaý komıssııasynyń tóraǵasy Qýandyq Turǵanqulovtyń «Aýyl ákimderiniń saılanbalyǵyn engizý - jergilikti jerlerde memlekettik basqarýdy sapaly túrde ózgertedi» atty maqalasy basylǵan. «Aýyl ákimderiniń saılanbalylyǵyn engizý jergilikti halyq úshin jergilikti bılik organdarynyń jumysyn baqylaýǵa naqty múmkindik berýdiń, memlekettik basqarý júıesin sapaly túrde ózgertýdiń tetigi bolyp tabylady. Bul - bizdiń elimizdiń saıası júıesin demokratııalandyrý jáne jetildirý jolyndaǵy jańa qadam. Sonymen qatar, bul saılaý Qazaqstan saılaý júıesiniń de damýynyń mańyzdy kezeńi, aýqymdy óńirlik elektorattyq naýqandardy uıymdastyrýda jáne ótkizýde jańa praktıkalyq tájirıbe jınaý úshin negiz bolyp tabylady»,-deıdi Q. Turǵanqulov.
* * *
«Aıqyn» gazetinde «Stýdent qalashyqtary salynady» degen maqala kópshilik nazaryna usynylyp otyr. Qazaqstanda alda bolatyn Qysqy ýnıversıadaǵa qatysýshylarǵa arnalǵan stýdentter qalashyqtarynyń qurylystary bastaldy. Qazaqstan stýdenttik sport federatsııasynyń prezıdenti Qaırat Zakırıanovtyń málimdeýinshe, Almaty qalasynda 20 myń stýdentke, Astanada 10 myń stýdent turatyn jataqhanalar salynbaqshy. Qazir Qazan qalasynda ótip jatqan 27-álemdik Jazǵy ýnıversıadaǵa álemniń 160 elinen 12 myń stýdent qatysýda. Stýdentterden basqa olardyń jattyqtyrýshylary, qosymsha qyzmet kórsetetin, jarysty qyzyqtaý úshin kelgen taǵy da sonshama adamdar bar. Bulardyń barlyǵyn jatyn orynmen qamtamasyz etý ońaı emes ekeni belgili. Sondyqtan Qazan qalasynyń basshylary, ýnıversıadany uıymdastyrý komıteti daıyndyq jumystaryna budan eki-úsh jyl buryn kirisken.
Osy basylymnyń jazýynsha, keshe kúndizgi saǵat 12-ge jaqyndaǵan mezgilde Almaty metropolıteni arqyly tasymaldanǵan jolaýshylardyń sany 11 mıllıonǵa qaraı ketti. Almaty qalasynyń ákimi Ahmetjan Esimov Abaı stansasynda jerasty kóliginiń 10 mıllıonynshy jolaýshysyn quttyqtap, úlken plazmalyq teledıdardy syıǵa tartty. Bul jaıynda «Almaty metropolıteni 10 mıllıon jolaýshy tasymaldady» degen maqalada berilgen.