Strasbýrgte Eýroparlamenttiń tórt kúndik sessııasy bastaldy
Kún tártibinde EO-daǵy kóshi-qondy baqylaý máseleleri, 2025 jylǵa arnalǵan Odaqtyń bıýdjeti, sondaı-aq álemdegi ózekti oqıǵalar qarastyrylady.
Onda Eýroparlament depýtattary Eýropalyq Keńestiń Horizon Europe jáne Erasmus+ (bilim berý) sııaqty EO-nyń negizgi baǵdarlamalaryn 1,52 mıllıard eýroǵa qysqartý týraly usynysyna qarsy shyǵady.
21 qazan kúni keshke Italııanyń burynǵy premer-mınıstri Enrıko Letta EO-nyń ishki naryǵyn nyǵaıtý týraly baıandamasyn usynyp, artynsha taqyryp boıynsha pikirtalas ótedi.
Eýrostattyń sońǵy derekterine sáıkes, ótken jyly EO halqynyń 21,4%-y (94,6 mıllıon adam) kedeılik nemese áleýmettik oqshaýlaný qaýpine tap bolǵan. Eń joǵary kórsetkish Rýmynııada (32%), Bolgarııada (30%) jáne Ispanııada (26,5%) tirkeldi.
22 qazanda eýropalyq depýtattar Ýkraına taqyrybyn talqylaıdy. Talqylaýdan keıin olar osy elge 35 mıllıard eýrony quraıtyn qarjylyq kómek paketine (G7 qoldaý bastamasynyń bóligi retinde) daýys beredi.
Eýroparlament Taıaý Shyǵystaǵy jaǵdaıdy da talqylaýdy josparlap otyr. Seısenbi kúni Lıvandaǵy jaǵdaı týraly pikirtalas bolady. Eýroparlament Izraıldiń Lıvandaǵy BUU ýaqytsha kúshteriniń nysandaryna birneshe ret shabýyl jasaǵannan keıin eldegi BUU mıssııasyn qorǵaýǵa shaqyrady.
23 qazanda kúnniń basty taqyryby kóshi-qon máselelesine aýysady. Eýroparlament depýtattary Eýropalyq komıssııamen Eýropada turýǵa quqyǵy joq úshinshi eldiń azamattaryn qaıtarýdy jeńildetý úshin EO zańnamasyna engiziletin yqtımal ózgeristerdi talqylaıdy.
Sondaı-aq 17 qazanda Brıýsselde ótken Eýroodaq sammıtiniń qorytyndysyn talqylaıdy. Sammıtten keıin kóshi-qon máselesi osy sessııanyń ózekti taqyryby bolyp qala beredi, óıtkeni parlamenttiń saıası toptary da ortaq kóshi-qon saıasatyn qalaı júrgizý kerektigi jóninde ortaq pikirde.
Buǵan deıin Qazaqstan men Eýropalyq Odaq parlamentaralyq yntymaqtastyǵyn nyǵaıtty.