Strandj kýbogy: Qazaqstandyq 10 boksshy shırek fınalda

NUR-SULTAN. QazAqparat - Bolgarııa astanasy Sofııa qalasynda bokstan dástúrli «Strandj kýbogy» ótip jatyr, dep habarlaıdy QazAqparat tilshisi.

«Kishi álem chempıonaty» atalyp ketken halyqaralyq týrnırde qazaqstandyq bylǵary qolǵap sheberleri de synǵa túsýde.

Atalǵan týrnır 19 aqpanda bastalǵan bolatyn. Búgin alǵashqy irikteý jekpe-jekteri aıaqtalyp, shırek fınalǵa shyqqan boksshylar belgili boldy.

Nátıjesinde Qazaqstan erler quramasynan shırek fınalǵa 10 boksshy shyqty.

Atap aıtsaq, Sanjar Táshkenbaı, Danııal Sábıt (ekeýi de 48 keli), Damır Ábdiqadyr, Tımýr Qabdeshov (ekeýi de 51 keli), Mahmud Sabyrhan (54), Abzal Serik (63,5), Dýlat Bekbaýov (67), Saǵyndyq Toǵambaı (86), Abzal Quttybekov (92) jáne Nurlan Saparbaı (92 keliden asa) shırek fınalǵa shyqty.

Bul halyqaralyq jarysqa 36 elden 450 boksshy qatysyp jatyr. Olardyń qatarynda Olımpıada, álem jáne Eýropa chempıondary da bar.

Týrnır 28 aqpanda máresine jetedi.