STOP trafık: Adam saýdasyna qatysty 68 qylmys anyqtaldy

NUR-SULTAN. QazAqparat – «STOP trafık» jedel aldyn alý is-sharasy barysynda adam saýdasymen baılanysty 68 qylmys anyqtaldy. Bul týraly QR ІІM Krımınaldyq polıtsııa departamenti bastyǵynyń orynbasary Qanat Nurmaǵambetov aıtty, dep habarlaıdy QazAqparat tilshisi.

«Osy jyldyń 22 qarashasy men 1 jeltoqsany aralyǵynda «STOP trafık» atty kezekti respýblıkalyq jedel aldyn alý is-sharasy ótkizildi. Іs-shara barysynda polıtsııa organdary adam saýdasyna qatysty 68 qylmysty anyqtady. Onyń ishinde jumysqa salý maqsatynda bostandyǵyna zańsyz shekteýdiń 3 faktisi, adam saýdasyna qatysty 2 fakti, kámeletke tolmaǵandardy saýdalaýdyń 2 faktisi, jezókshelikpen aınalysýǵa tartýdyń 8 faktisi bar», - dedi ol ІІM baspasóz qyzmeti alańynda ótken brıfıngide.

Onyń dereginshe, jezókshelikpen jáne jeńgetaılyqpen aınalysýdy uıymdastyrýdyń nemese prıton ustaýdyń 53 faktisi áshkere bolǵan.

«Sonymen qatar bile tura jezókshelikpen jáne jeńgeıtaılyqpen aınalysýǵa úı-jaı berý faktisi boıynsha 21 ákimshilik quqyq buzýshylyq tirkeldi. Jeńil júristilerdiń qoǵamdyq orynda adamdarǵa jabysqany úshin 600-den astam ákimshilik hattama toltyryldy», - dedi Qanat Nurmaǵambetov.