«Stepnogorsk JES» kompanııasyna 2,1 mln teńge aıyppul salyndy

NUR-SULTAN. QazAqparat - «Stepnogorsk JES» JShS-nyń qyzmetine jospardan tys tekserý júrgizildi jáne 2,1 mln teńge aıyppul salyndy, dep habarlaıdy QazAqparat QR Ulttyq ekonomıka mınıstrligi Tabıǵı monopolııalardy retteý komıtetiniń baspasóz qyzmetine silteme jasap.

Tekserý komıtettiń Aqmola oblysy boıynsha departamenti ótinish negizinde júrgizilgen. Ol «Stepnogorsk JES» kompanııasynyń 2020 jylǵa arnalǵan taýarlardy, jumystardy jáne qyzmetterdi satyp alýǵa qatysty qyzmetine qatysty bolǵan.

Komıtettiń túsindirýinshe, «Tabıǵı monopolııalar týraly» zańnyń 23-baby 6-tarmaǵyna sáıkes tabıǵı monopolııa sýbektisin satyp alý elektrondyq nysanda óziniń ınternet resýrsynda ornalastyrýy kerek, al onyń saıty bolmaǵan jaǵdaıda ýákiletti organǵa ınternet resýrsqa ornalastyrýy úshin joldaıdy. Onda satyp alý protsesiniń ár kezeńi týraly aqparat kórsetilýi tıis.

Al taýar bırjalary, elektrondyq saýda alańdary arqyly satyp alý jáne onyń nátıjesi týraly málimetti kompanııa óz saıtynda jarııalaýy kerek.

«Tabıǵı monopolııalar týraly» zańnyń 23-babyn buzǵany úshin, «Stepnogorsk JES» JShS QR Ákimshilik quqyq buzýshylyq týraly kodeksiniń 164-baby 4-bóligi boıynsha ákimshilik jaýapkershilikke tartyldy, qysqartylǵan is júrgizý tártibimen 2 120 800 teńge mólsherinde aıyppul tólendi», delingen habarlamada.