Stepnogordegi álimjettik: Mektep-ınternatta keshendi monıtorıng júrgiziledi

STEPNOGOR. QazAqparat - Stepnogor qalasyndaǵy olımpıadalyq rezerv daıarlaıtyn sport mektep-ınternatynyń tárbıelenýshileri arasyndaǵy janjal Nur Otan partııasy Stepnogor aýmaqtyq fılıalynyń partııalyq baqylaý komıssııasy men áleýmettik máseleler jónindegi qoǵamdyq keńestiń birlesken otyrysynda qaraldy, dep habarlaıdy QazAqparat tilshisi.

Nur Otan partııasynyń Stepnogor aýmaqtyq fılıalynan habarlaǵandaı, partııalyq baqylaý komıssııasy partııa fılıalynyń Saıası keńesi bıýrosyna burynǵy mektep dırektory, qalalyq máslıhat depýtaty Tursynbaı Toqqojınovqa sógis túrinde partııalyq jaza qoldaný arqyly bolǵan oqıǵa úshin partııalyq jaýapkershilik týraly máseleni qaraýdy usyndy.

«Tursynbaı Toqqojınovtyń dırektor qyzmetinen bosatylýy máseleni bir kúnde sheshpeıdi, dálirek aıtsaq, oqý ornynda jasóspirimderdiń arasynda álimjettik bar. Bul mektep ákimshiliginiń, pedagogıka ujymynyń baqylaýynyń álsizdigi jáne salǵyrttyǵy saldarynan osyndaı oqıǵa boldy. Sonymen qatar, mektep dırektory oqıǵanyń oryn alǵanyn bile tura, quqyq qorǵaý organdary men kámeletke tolmaǵandar isteri jónindegi komıssııany habardar etpesten ústirtin ishki tergeý júrgizgen. Sondaı - aq, dene shynyqtyrý jáne sport basqarmasy da habardar etilmedi», - dep atap ótti vedomstvodan.

Internattaǵy tárbıeshilerdiń jumys kestesi standarttarǵa sáıkes kelmedi. Belgili bolǵandaı, balalar keshki ýaqytta qaraýsyz qalǵan. Sondyqtan otyrysta «Baqytty otbasy» partııalyq jobasy aıasynda mektep-ınternatqa keshendi monıtorıng júrgizý jáne tárbıe jumysy máselelerine erekshe nazar aýdarý týraly sheshim qabyldandy.

Eske sala keteıik, Stepnogor qalasynyń Bógenbaı batyr atyndaǵy sport mektebiniń 8-synyp oqýshysy 7-synyptyń eki oqýshysyna qatysty jataqhana bólmesinde álimjettik jasaǵan bolatyn. Ony uryp-soǵýshy balanyń synyptasy telefonnyń beınejazbasyna túsirip alǵan. Bul beınejazba áleýmettik jelide rezonans týdyrdy.

Aqmola oblysy ákiminiń kóshpeli keńesiniń qorytyndysy boıynsha Dene shynyqtyrý jáne sport basqarmasyna Bógenbaı batyr atyndaǵy olımpıadalyq rezerv daıarlaıtyn sport mektep-ınternatynyń dırektoryn Tursynbaı Toqqojınovtyń atqaratyn laýazymyna sáıkes kelmeý máselesin qaraý tapsyryldy, dene shynyqtyrý jáne sport basqarmasynyń basshysy Áset Bókibaevqa fýnktsıonaldyq mindetterin tıisinshe oryndamaǵany úshin qatań sógis jarııalandy.

Sondaı-aq, Stepnogor qalasynyń ákimine áleýmettik salaǵa jetekshilik etetin, kámeletke tolmaǵandardyń isteri jáne olardyń quqyqtaryn qorǵaý jónindegi qalalyq komıssııanyń tóraıymy, ákimniń orynbasary Gúlnaz Ábilovany tártiptik jaýapkershilikke tartý týraly máseleni qaraý tapsyryldy. Buǵan qosa, oqıǵa boıynsha polıtsııa qylmystyq is qozǵady.