Stepnogordaǵy apatty jaǵdaı: qalada birneshe turǵyn úı jylýsyz qaldy

KÓKShETAÝ. QazAqparat - Stepnogordaǵy JEO jylý júıelerindegi aqaýdan, birneshe shaǵynaýdandaǵy kóptegen turǵyn úıler jylýsyz qaldy. Bul týraly qala turǵyndary áleýmettik jelige shaǵymdaryn aıtyp jazdy, dep habarlaıdy QazAqparat tilshisi.

Qala turǵyndarynyń aıtýynsha, bıylǵy jyldyń sońǵy eki aıynda Stepnogordegi JEO-da osymen tórtinshi reti apat oryn alyp otyr.

«Osynyń saldarynan qala turǵyndary jylýsyz jáne sýsyz qaldy. Qala basshylyǵy jylý agregattaryndaǵy aqaýdy syltaý etip, turǵyndarǵa túsinistik tanytýǵa shaqyrady. Arzan emes kommýnaldyq aqy tólep otyrǵan turǵyndardyń jaǵdaıyn kim túsinedi?», - dep jazdy qala turǵyndary áleýmettik jelilerge.

Osy rette «Stepnogor JEO» JShS basshylyǵy jylý jelileri tozǵandyqtan apatty jaǵdaı oryn alyp otyrǵanyn aıtyp aqtalýda.

«Qaladaǵy jylý júıeleriniń ábden tozǵandyǵynan bıylǵy jylytý maýsymynda birneshe ret apatty jaǵdaılar oryn aldy. Sol sebepti, jylýdy ýaqytsha toqtaýǵa týra keldi», - dep jaýap berdi turǵyndardyń áleýmettik jelidegi shaǵymdaryna «Stepnogor JEO» JShS ákimshiligi.

Sonymen birge, kásiporyn basshylyǵy qazirgi tańda aqaýdy joıý jumystar qolǵa alynǵanyn jáne jaqyn ýaqytta qala jylýmen tolyq qamtamasyz etiletin aıtýda.

«Qazirgi ýaqytta qalany jylytý úshin jiberilgen ystyq sýdyń temperatýra 54 S quraıdy. Qala boıynsha barlyǵy 13 magıstraldy qudyq bar, tıisinshe shaǵyn aýdandar boıynsha ystyq sýdy ótkizý men jylý berý ártúrli bolady. Dál qazir JEO-dan shyǵý kezinde ystyq sýdyń temperatýrasy 95 S, al progress kezinde 88 S quraıdy. Saǵat 16:00-ge deıin JEO-dan shyǵatyn ystyq sýdyń temperatýrasyn 105 C deıin kóterý josparlanýda», - dep tolyqtyrdy «Stepnogor JEO» JShS ákimshiligi.

Aslan Ospanov.