Stepnogordaǵy álimjettik: jeti tárbıelenýshi oqýdan shyǵaryldy

KÓKShETAÝ. QazAqparat - «Nur Otan» partııasynyń Aqmola oblystyq fılıaly janyndaǵy Otbasy, áıelder jáne balalardyń quqyqtaryn qorǵaý máseleleri jónindegi Qoǵamdyq keńestiń otyrysy ótti. Onda Stepnogor qalasynyń Bógenbaı batyr atyndaǵy olımpıadalyq rezervtiń oblystyq mamandandyrylǵan mektep-ınternat-kolledjindegi jaǵdaıdy monıtorıngileý jáne zerdeleý qorytyndysy boıynsha qabyldanǵan sharalar qaraldy, dep habarlaıdy QazAqparat tilshisi.

Jınalǵandardy ınternatta ótken monıtorıng nátıjelerimen Aqmola oblysynyń Bilim salasyndaǵy sapany qamtamasyz etý departamenti basshysynyń orynbasary Gúlnar Tasbolatova tanystyrdy.

«Monıtorıng barysynda oqıǵa boıynsha mektep-ınternat dırektory Tursynbaı Toqqojınovpen jáne tárbıe jumysy jónindegi orynbasarynyń mindetin atqarýshymen áńgime júrgizildi. Pedagog-psıhologpen saýalnama júrgizildi, oǵan 88 adam qatysty. Onda qaýip-qater, qarǵys, qorlaý, sizden aqsha talap etildi me, tamaq alyndy ma, fızıkalyq kúsh qoldanyldy ma degen sııaqty sıpattaǵy suraqtarǵa jaýaptar alyndy. Saýalnama nátıjeleri býllıng, fızıkalyq zorlyq-zombylyqpen qorqytý oqıǵalarynyń bar ekenin kórsetti, tamaq alyp, aqsha bopsalaǵan jaǵdaılar boldy», - dep atap ótti G.Tasbolatova.

Sonymen qatar, oqý-tárbıe úderisin uıymdastyrý boıynsha qujattar zerdelendi. Taldaý tárbıe jumysynyń qalyptasqan júıesiniń, mektepishilik baqylaý josparynyń, áleýmettik pedagog jáne pedagog-psıholog baǵdarlamalarynyń joqtyǵyn kórsetti.

Onyń aıtýynsha, ınternat kadrlarynyń turaqsyzdyǵy da alańdaýshylyq týdyrady.

Aqmola oblystyq dene shynyqtyrý jáne sport basqarmasynyń basshysy Áset Búkibaevtyń aıtýynsha, oqýshylardy urǵany úshin erkin kúres bóliminiń tórt tárbıelenýshisi jáne barlyq is-áreketterdi baqylap turǵan úsh bala oqý ornynan shyǵaryldy.

«Bul balalar ınternatqa qaıta oralmaıdy. Balalar qarapaıym mektepterge oraldy. Olardyń ekeýi Nur-Sultanǵa, úsheýi – Krasnoıarǵa, bireýi – Aqkól qalasyna ketti, bireýi Stepnogor qalasynda turady. Komıssııa olardy esepke alýdy usyndy», - dep atap ótti Á.Búkibaev.

Tekserý qorytyndysy boıynsha ınternat-kolledjiniń dırektory T.Toqqojınov qyzmetinen bosatyldy. Óz laýazymdyq mindetterin tıisinshe oryndamaǵany úshin tárbıeshi J.Habahaı, erkin kúres bóliminiń jattyqtyrýshy-oqytýshysy A.Qalıjanov, dırektordyń tárbıe isi jónindegi orynbasarynyń mindetin atqarýshy. A.Qurmanbaeva jáne dırektordyń sport jónindegi orynbasary M. Maqyshev qatań sógis túrinde tártiptik jaýapqa tartyldy.

Aqmola oblysynyń polıtsııa departamenti Qylmystyq kodekstiń 141 babybynyń 1 bóligi «balalardyń ómiri men densaýlyǵynyń qaýipsizdigin qamtamasyz etý jónindegi mindetterdi tıisinshe oryndamaý» jáne 194 babynyń 2 bóligi «qorqytyp alýshylyq» boıynsha sotqa deıingi tergeýdi qolǵa aldy.