Stepnogorda túrme qyzmetkeri 400 myń teńge para alǵany úshin sottaldy

KÓKShETAÝ. QazAqparat- Aqmola oblysynyń Stepnogor qalasyndaǵy túzetý mekemesiniń qyzmetkeri jemqorlyq úshin sottaldy, dep habarlaıdy QazAqparat tilshisi oblystyq prokýratýranyń baspasóz qyzmetine silteme jasap.

2019 jyldyń qyrkúıeginde Stepnogor qalalyq prokýratýrasyna jergilikti túzeý mekemesinde jazasyn ótep jatqan sottalǵandardyń biriniń ákesi shaǵymdanǵan.

Aryzdanýshynyń aıtýynsha, ol 2019 jyldyń shildesinde ulynyń ótinishi boıynsha olarǵa jalpy qamqorlyǵy men qolaıly jaǵdaı jasaý úshin K. atty azamatqa 400 myń teńge somasynda «QIWI» elektrondyq ámııanyna aqshalaı qarajat aýdarǵan. Qala prokýratýrasy osy faktilerdi tekserýdi sybaılas jemqorlyqqa qarsy qyzmetke tapsyrdy.

2020 jyldyń 21 qańtarynda Stepnogor qalalyq soty azamat K.-ny QR QK 366-babynda kózdelgen - para alý qylmysyn jasaǵany úshin kináli dep tanydy. Oǵan 12 mıllıon teńge aıyppul salynyp, memlekettik qyzmettegi laýazymdardy atqarý quqyǵynan ómir boıyna aıyrdy. Sondaı-aq, burynǵy qyzmetker «ádilet maıory» arnaıy ataǵynan da aıyryldy.

Úkim zańdy kúshine endi.

Osylaısha, qylmystyq-atqarý júıesi qyzmetkeriniń zańsyz qyzmeti toqtatyldy. Osy baǵyttaǵy jumys odan ári jalǵasady.