Startaptarǵa tartylǵan ınvestıtsııa 67 mlrd teńgege jetkiziledi - Janat Qojahmetov
«Búginde Qazaqstan aýqymdy protsesterden qalyp qoımas úshin qajetti qadamdardy iske asyryp jatyr. Elimizdiń ınnovatsııalyq áleýeti óte joǵary jáne onyń múmkindigi jete baǵalanbaı otyr. Atap aıtqanda, Qazaqstanda talantty jastar kóp kezdesedi, sonymen qatar halyqtyń saýattylyǵy deńgeıi jaǵynan da elimiz álemde joǵary oryndardyń birinde. Táýelsizdik jyldarynda álemdik sanattaǵy ýnıversıtetter men mektepterdi qurdyq. Endi osy áleýetti naqty ónimge túrlendiretin ýaqyt jetti», - dedi QR Aqparat jáne kommýnıkatsııalar mınıstrliginiń jaýapty hatshysy Janat Qojahmetov.
Sonymen qatar ol jaqynda Elbasynyń qatysýymen «Astana Hub» halyqaralyq ІT-startaptar tehnoparkiniń jumysy resmı iske qosylǵanyn eske salyp ótti. Onyń mıssııasy - jańa qazaqstandyq ınnovatsııalyq ekojúıeniń ortalyq býynyna aınalý. Osy oraıda barsha álemnen jas ári talantty ІT-mamandar tartylatyn oshaqqa aınaldyrý maqsaty belgilengen. Habtyń orbıtasynda jas startapshylar, ınvestorlar, oqytýshylar, ulttyq kompanııalar men memlekettik organdar ózara is-qımyldy ornatady.
J. Qojahmetovtiń sózine qaraǵanda, bul sharalardy iske asyrý úshin barlyq ınfraqurylym, quqyqtyq jáne qarjylyq jaǵdaılar jasalǵan. Bıyl shildede venchýrlyq qarjylandyrý týraly zań qabyldanyp, Astana Hub-tyń sheteldik qatysýshylary úshin vızalyq eńbek rejimi jeńildetildi.
«Bıyl tehnopark AQSh-taǵy jáne kórshiles elderdegi birneshe halyqaralyq akseleratorlarmen yntymaqtastyqty bastady. Búginde Astana Hub aýmaǵynda 150-den astam komanda ózderiniń jobalaryn damytýǵa kiristi. 2022 jylǵa qaraı startaptarǵa tartylǵan ınvestıtsııalar kólemin 67 mlrd teńgege deıin jetkizý jospary bar», - dedi jaýapty hatshy.
Óz kezeginde Qazaqstandaǵy Úndistan Elshisi Prabhat Kýmar Astana Hub-ty qurý tujyrymdamasy men bastamasy óte durys qarastyrylǵanyn atap ótti.
Onyń paıymynsha, aldaǵy ýaqytta ol aqparattyq tehnologııalardy damytý turǵysynda Qazaqstannyń áleýetin kóterýge múmkindik beredi.
«Salyq salý jáne basqa da baǵyttardaǵy jańashyldyqtar Qazaqstanǵa álemdik tsıfrlyq ekonomıka salasynda qarqyndy damýǵa yqpal etedi», - dedi Prabhat Kýmar.