Starlink qurylǵylaryn óz erkimen qosqandarǵa aıyppul salynady - mınıstrlik

<p>Tsıfrlyq damý, ınnovatsııalar jáne aeroǵarysh ónerkásibi mınıstrligi Telekommýnıkatsııalar komıteti Baılanys salasyndaǵy baqylaý basqarmasynyń basshysy Dıas Tólegenov Starlink ınternet tehnologııasyna jeke adamdardyń qosylýy múmkindigine qatysty túsinik berdi, dep habarlaıdy <a href="https://kaz.inform.kz/" target="_blank" rel="noopener">Kazinform.</a></p>

Búgin elordada ótken baspasóz máslıhatynda tilshiler SpaceX kompanııasynyń Starlink ınternet tehnologııasyna jeke adamdardyń qosylýyn zańnamalyq retteý múmkindigi týraly surady.

«Qazir ǵalamtorda Starlink-ke arnalǵan qurylǵylar satylyp jatyr. Bul qurylǵylardy iske qosý zańdy ma?», - dep surady jýrnalıster.

«Rasynda da mundaı jarnamalar kezdesip jatyr. Sondyqtan tıisti organdar osyǵan qatysty túsindirip jatyr. Qazir ony dál osy nusqada paıdalaný qoldanystaǵy zańnama talaptaryn buzady, sebebi qaýipsizdiktiń keıbir erejesine saı kelmeıdi. Bul turǵyda, pılottyq joba (elimizdegi mektepterdi Starlink-ke qosý) aıasyndaǵy tehnıkalyq jumystar aıaqtalyp, zańǵa tıisti ózgerister engizilgenge deıin atalǵan qurylǵylardy jeke adamdardyń paıdalanýy zańsyz bolyp esepteledi», - dedi D. Tólegenov.

Onyń aıtýynsha, zańnamaǵa túzetýler engizilgennen keıin qazaqstandyqtar bul jabdyqtardy paıdalana alady. Qazir osy qurylǵylardy zańsyz qosqandar bastapqyda eskertý alady. Eger bul derek qaıtalansa, onda 10 AEK somasynda aıyppul salynady.

Budan buryn habarlanǵandaı, bıylǵy qazan aıynda 10 aýyldyq mektep SpaceX kompanııasynyń Starlink tehnologııasy arqyly testilik rejımde keń jolaqty ınternetke qosyldy.