Sputnik-V ne sebepti revaktsınalaýǵa qoldanylmaıdy

NUR-SULTAN. QazAqparat – QR DSM sanıtarlyq-epıdemıologııalyq baqylaý komıtetiniń tóraǵasy Aıjan Esmaǵambetova revaktsınalaý úshin Sputnik-V vaktsınasy nege qoldanylmaıtynyn túsindirdi, dep habarlaıdy QazAqparat tilshisi.

«Qazirgi ýaqytta bizde Sputnik-V bar jáne ol revaktsınalaý úshin qoldanylmaıdy. Óıtkeni, ózderińiz biletindeı, onda eki túrli komponent bar. Revaktsınalaý úshin «Spýtnık laıt» vaktsınasy qoldanylady. Qazirgi ýaqytta Qazaqstanda SQ-Farmatsııa qoımalaryna, ıaǵnı 4 óńirdegi dári-dármek habtaryna 150 myń doza «Spýtnık laıt» jetkizildi. Osy apta sońyna deıin vaktsına kólemi óńirlerge bólinip, jetkiziletin bolady. Árıne jetkizý ýaqyty aýa raıyna da tikeleı baılanysty bolady. Osy apta sońyna deıin vaktsına óńirlerge jetkizilip, revaktsınalaý úshin qoljetimdi bolady dep josparlap otyrmyz», - dep jaýap berdi A. Esmaǵambetova tilshi suraǵyna.

Spıkerdiń aıtýynsha, «Spýtnık laıt» Qazaqstanda óndirilmegen, vaktsınanyń 150 myń dozasy reseılik óndirýshilen satyp alynǵan.

«Alǵashqy 150 myń doza reseılik óndirýshilen satyp alyndy, óıtkeni daıyn vaktsınany satyp alyp, óńirlerge jetkizý bárinen jyldam boldy. Vaktsınany óz elimizde óndirý úshin ony ákelý kerek, óndirý kerek jáne barlyq sertıfıkattyq jumystardy júrgizý kerek. Oǵan kóp ýaqyt jumsalar edi. «Spýtnık laıt» revaktsınalaýǵa qoljetimdi bolýy úshin 150 myń dozasy satyp alyndy», - dep túsindirdi Aıjan Esmaǵambetova.