«Spýtnık V» ázirleýshileri musylmandarǵa vaktsınanyń halal ekendigin aıtty

MÁSKEÝ. NUR-SULTAN. QazAqparat – Reseı musylmandary dinı basqarmasy Spýtnık V vaktsınasyn jasaýshylardan onyń quramy týraly aqparat aldy. Aldyn ala málimetter boıynsha, olarda musylmandar úshin tyıym salynǵan eshteńe joq, dedi Reseı Federatsııasy Musylmandar dinı basqarmasynyń tóraǵasynyń orynbasary, múftı Ildar Alıaýtdınov. Bul týraly QazAqparat «RIA Novostı» agenttigine silteme jasap habarlaıdy.

Buǵan deıin musylmandardy jańa vaktsına komponentteriniń halaldyqqa sáıkestigi oılandyrǵan bolatyn. Ásirese olardy óndiris protsesinde shoshqa jelatınin qoldaný alańdatty. Buǵan deıin Tatarstan múftııatynda habarlaǵandaı, eger ol qandaı da bir túrde qoldanylsa, onda vaktsına jaramsyz, al ony musylmandardyń paıdalanýyn din mamandary sheshýi kerek.

«Ázirleýshilerden jaýap keldi. Shoshqa jelatıni joq, adamnyń quramdas bólikteri (jasýsha jelisi) de joq. Biz Islam turǵysynan tyıym salynǵan nárse joq dep aıta alamyz», – dedi Alıaýtdınov.

Onyń aıtýynsha, ázirleýshilerge vaktsınanyń quramy týraly suraqtar qoıyldy jáne kelesi aptada vaktsınalardy ázirleýmen aınalysatyn ǵylymı ınstıtýttardyń ókilderi men din mamandarynyń birlesken otyrysy josparlanýda.

«Sonymen qatar biz dinı-quqyqtyq qorytyndy – pátýá daıyndaımyz», – dep túsindirdi múftı.

Aıta keteıik, dál osy saýal keshe Ortalyq kommýnıkatsııalar qyzmetindegi baspasóz máslıhaty barysynda QR Densaýlyq saqtaý vıtse-mınıstrleri Ajar Ǵınııat pen Erlan Qııasovqa qoıylǵan bolatyn.