«Sporttyq nysandar tolyqtaı ázir» - respýblıkalyq basylymdarǵa sholý

ASTANA. 20 qańtar. QazAqparat - Qazaq aqparat agenttigi respýblıkalyq basylymdarda 20 qańtar, beısenbi kúni shyqqan ózekti materıaldarǵa sholýdy usynady.

***

«Qazaqstanda Aq Azıada ótetini belgili bolǵanda barshamyzdy sporttyq nysandardyń jaı-kúıi alańdatqan edi. Jasyratyny joq, uzaq jyldar boıy elimizde qysqy sport túrlerine durys kóńil bólinbeı keldi. Sonyń saldarynan nátıjemiz kúrt tómendedi. Olımpıada oıyndary men álem chempıonattarynda medaldiń syńyǵyryn estimegeli talaı jyldyń júzi boldy. Sonymen qatar sporttyq ǵımarattardyń da toz-tozy shyqty. Kezinde dańqy órlegen Medeý men Shymbulaqtyń basynan baǵy taıǵany barshaǵa málim. Respýblıkamyzda odan basqa halyqaralyq talapqa saı nysandar joqtyń qasy. Osynyń barlyǵyn oı eleginen ótkizgen jurtshylyq «Qysqa ǵana merzim aralyǵynda olardyń barlyǵyn qalpyna keltire alamyz ba?» dep kádimgideı abyrjydy», - dep jazady «Aıqyn» gazeti beısenbilik sanyndaǵy «Sporttyq nysandar tolyqtaı ázir» degen maqalasynda.

Basylymnyń atap ótýinshe, qazirgi ýaqytta barlyq sharýa ret-retimen júzege asyp, Qazaqstan Azııa oıyndaryna jaqsy daıar­lyqpen keldi. Astana men Almaty qalalarynda biraz ǵımarattar men nysandar boı kóterdi. Keı­biri kúrdeli jóndeýden ótti. Olar­dyń barlyǵy halyqaralyq talaptarǵa saı jabdyqtalyp, qazir kóz­diń jaýyn alyp tur. Jýyrda Qazaqstan Respýblıkasynyń Pre­zıdenti barlyq nysandardy aralap, atqarylǵan jumysqa rı­za­shylyǵyn bildirse, shetelden at arytyp arnaıy kelgen sarapshylar da ońdy baǵalaryn berdi. Endi alań­daýǵa sebep joq. Qazaqstan Aq Azıa­dany qabyldaýǵa tolyqtaı ázir dep nyq senimmen aıtýǵa bola­dy.

Osy basylymnyń jazýynsha, keshe Qarjy mınıstrligi Kedendik baqylaý komıteti tóraǵasynyń orynbasary Ómirzaq Beıispekov: «Qarashyǵanaq Petroleým Opereıtıng» kompanııasyna respýblıkalyq bıýdjetke kedendik tólemder boıynsha 21 mlrd teńge qaryzyn qaıtarttyq», - dep málimdepti. Basylymnyń atap ótýine qaraǵanda, Bul soma munaı-gaz kom­pa­nııasynan sońǵy 5 jylda júr­gi­zil­gen tekseristerdiń nátı­je­sinen keıin óndirip alynypty. Osy ýa­qytqa deıin salyq tó­leýden jal­tarǵan kompanııa preferen­tsııa­larǵa qatysty qujattardy durys kórsetpeı kelgen kórinedi. «Esterińizde bolsa, byltyr Qarjy polıtsııasy «Qa­­rashyǵanaq Petroleým Ope­reı­tıng» kompanııasynyń bas­shy­lary men qyzmetkerleriniń ústi­nen salyqtan jaltarǵany jáne aldaý-arbaý isimen aına­lysqany úshin 2 qylmystyq is qozǵaǵan bolatyn. Onyń soń­ǵysy jabylsa, al alǵash­qy­sy­nyń nátıjesi joǵa­rydaǵydaı jaǵdaıda órbigen», - delingen "Kedendik qadaǵalaý kúsheıedi" degen taqyryppen berilgen maqalada.

***

«Alash aınasy» gazetiniń búgingi sanynda «Ulttyq biryńǵaı testileýdiń formaty ózgermeıdi» degen taqyryppen maqala basyldy. Basylymnyń jazýynsha, mınıstr oryntaǵyna kelip jaıǵasqan boıda «bilim salasyna adam sengisiz reforma júrgizip, talapkerlerdiń baǵyn synaıtyn testileý júıesine ózgeris engizemin» dep shý shyǵarǵan Bilim jáne ǵylym mınıstri Baqytjan Jumaǵulov raıynan qaıtyp qalypty. Keshe Premer-Mınıstr Kárim Másimovtiń qatysýymen ótken keńeıtilgen alqa májilisinde bas ustaz Ulttyq biryńǵaı testileýdiń formaty ózgermeıtinin málim etken. Sondaı-aq mektepke deıingi tárbıe berý máselesine de aıryqsha toqtalyp ótken vedomstvo basshysy: «2020 jylǵa qaraı balabaqshamen qamtý máselesi 100 paıyz sheshilýi shart. Bul turǵyda mınıstrlik pen jergilikti atqarý organdaryn qaýyrt jumystar kútip tur. Búgingi tańda «Balapan» baǵdarlamasy tabysty oryndalyp keledi. Endi bul baǵdarlamanyń 2014 jylǵa qaraı tolyq júzege asýyn, sonymen qatar osy tektes baǵdarlamanyń 2020 jylǵa deıin jalǵasýyn qamtamasyz etý kerek», - dep atap kórsetken.

«Qoǵamdyq tártipti kúsheıtý úshin halyq jasaqshylaryna uqsas qurylym qajet pe?». «Alash aınasy» gazetiniń turaqty «Oı-kókpar» aıdarynda talqyǵa salynǵan dál osy saýalǵa jaýap bergen Astana qalalyq ishki ister departamentiniń bastyǵy Marat Demeýov polıtsııa jumysyna degen senimdilik kóptegen faktorlar arqyly qurylatyn aıta kele: «Bul - azamattardan túsken aryz-shaǵymdardy ýaqytynda qarap, sheshim qabyldaý, qylmys boıynsha tyńǵylyqty, sapaly tergeý jumystaryn júrgizý jáne sotqa jiberý, der kezinde protsessýaldy sheshimder qabyldaý, azamattardyń konstıtýtsııalyq quqyqtaryn qamtamasyz etý. Osy turǵydan qylmystyń aldyn alýǵa jáne ashýǵa halyqtyń tikeleı atsalysýy, qoǵamdyq kómekshilerdiń polıtseılerge qolǵabys berýi qoǵamdyq tártipti qamtamasyz etýde óte tıimdi qadam ekeni áldeqashan dáleldengen» - deıdi.

Al bundaı qurylymnyń irge qalaýyna qarsylyq tanytqan halyq qalaýlysy Nurtaı Sabılıanov: «Qoǵamdyq tártipti qadaǵalaý úshin halyq jasaqshylary qurylymyn quryp, solardy quqyq qorǵaý júıesine aralastyrý degen máselege esh kelispeımin. Óıtkeni mundaı jasaqshylardyń zańdyq turǵydaǵy quqy, mindeti, jaýapkershiligi de bola bermeıdi. Sol turǵydan keletin bolsaq, álgindeı halyq jasaqshylary óreskel qımyldarǵa barsa, basqanyń quqyn buzsa, olardyń jaýapkershilikten qutylyp ketýi de ońaı», - dep óz paıymyn alǵa tartady.

***

«Premer-Mınıstr Kárim Másimov 2010 jylǵy Densaýlyq saqtaý mınıstrliginiń jumys qorytyndysymen tanysty», - dep jazady «Kazahstanskaıa pravda» gazeti búgingi sanyndaǵy «Zdorovye ıtogı» atty maqalada. Basylymnyń atap ótýinshe, ótken jyly aıaqtalǵan 2005-2010 jyldarǵa arnalǵan Qazaqstan Respýblıkasynyń densaýlyq saqtaýdy reformalaý jáne damytý baǵdarlamasy atalǵan kezeńde salada birqatar oń ózgeristerge qol jetkizýge múmkindik bergen. Atap aıtqanda, demografııalyq kórsetkish jaqsaryp, bala týý 25 paıyzǵa, jalpy ólim-jitim 11 paıyzǵa tómendegen. Al qazaqstandyqtardyń ortasha ómir súrý uzaqtyǵy 2 jylǵa uzarǵan. Sondaı-aq birqatar áleýmettik mańyz bar aýrý túrleriniń qatary turaqty túrde tómendep, qan qyzmeti jetildirilgen, respýblıkanyń barlyq óńirinde medıtsınalyq aqparattyq-saraptamalyq ortalyqtar qurylǵan.

***

«Qazaqstandyqtar avtomat kómegimen bılet satyp ala alady», - delingen «Lıter» gazetiniń «Najmı na knopký» degen taqyryppen basylǵan maqalasynda. Basylymnyń baıandaýynsha, keshe elimizdiń birqatar iri qalalarynyń vokzaldarynda ózine-ózi qyzmet kórsetý jańa tranzaktsııalyq termınaldarynyń tusaýkeseri ótken. Endi Almaty, Astana, Qarǵandy nemese Aqtóbeden saparlaıtyn jolaýshylarǵa dástúrli kassa aldynda kezekke turyp, bılet satyp alýdyń esh qajeti joq. Bundaı 10 avtomat ótken jyldyń 31 jeltoqsanynan bastap atalǵan qalalardyń vokzaldarynda, sonymen qatar «Qazaqstan temir joly» UK» AQ-nyń ǵımaratynda ornatylǵan.