Sporttyq jáne jaýyngerlik sambodan Ulttyq ulan Bas qolbasshysynyń týrnıri ótti

<p>ASTANA. KAZINFORM &ndash; Jaqynda Aqtóbe qalasyndaǵy &laquo;Jekpe-jek&raquo; saraıynda ótken sporttyq jáne jaýyngerlik sambodan Ulttyq ulan Bas qolbasshysynyń Kýbogyna arnalǵan týrnır ótti. QR ІІM Ulttyq ulanynyń baspasóz qyzmetiniń habarlaýynsha, úsh kúnge sozylǵan sporttyq sharada, ulandyqtar óz óńirleriniń abyroıyn asqaqtatýǵa bar kúshin saldy. Saıys nátıjesi boıynsha jalpy komandalyq esepte bes altyn medaldi oljalaǵan &laquo;Batys&raquo; óńirlik qolbasshylyǵynyń komandasy jeńimpaz atandy. Ekinshi oryndy astanalyq 5573 áskerı bóliminiń sportshylary alsa, úshinshi satyǵa &laquo;Ońtústik&raquo; óńirlik qolbasshylyǵynyń balýandary kóterildi.</p>

– Bul jarys tek myqtylardyń jeńisin emes, áskerı tártip pen batyrlyq rýhyn aıqyn kórsetti. Ulttyq ulan sarbazdary árdaıym bıik deńgeıde ekenin taǵy bir márte dáleldedi. Sizderdiń jetistikterińiz – elimizdiń abyroıy. Aldaǵy saıystarda da bıikterden kórinedi dep senim bildiremin, – dedi óz sózinde general-maıor Baýrjan Abjanov.

Aıtyp ótý kerek, úsh kúnge sozylǵan sporttyq sharada balýandar ózara myqtyny anyqtady. Ulttyq ulan Bas qolbasshylyǵy dene daıarlyǵy jáne sport bóliminiń bastyǵy polkovnık Sátjan Ábishevtiń aıtýynsha, osy saıysta utqan sportshylar bolashaqta QR Іshki ister mınıstriniń júldesi úshin synǵa túsetin bolady. 

Foto: Ulttyq ulan

–70-ke jýyq jaýynger qatysty. Onyń ishinde halyqaralyq dárejedegi 5 sport sheberi, 35 sport sheberi jáne 25 sport sheberine úmitker bar. Barlyǵynyń daıyndyq deńgeıi joǵary», - dedi polkovnık Sátjan Ábishev.

Sporttyq sambodan jekelegen salmaq dárejeleri boıynsha, 58 keli salmaqta qatardaǵy jaýynger Salıh Shárip («Batys» óńirlik qolbasshylyǵy), 64 keli salmaq boıynsha sharshy alańǵa shyqqan qatardaǵy jaýynger Erjan Erenqaıypov (5573 áskerı bólimi), 71 keli salmaqta Oljas Abdývalıev (5573 áskerı bólimi) altynnan alqa taǵyndy. Al 79 kelide qatardaǵy jaýynger Tilek Toqtasynuly (5573 áskerı bólimi), 88 keli salmaqta qatardaǵy jaýynger Azat Qýanov («Batys» óńirlik qolbasshylyǵy) jáne 98 kelige deıin salmaq dárejesinde qatardaǵy jaýynger Elaman Qoıshybaev («Batys» óńirlik qolbasshylyǵy) chempıon atandy. 

Jaýyngerlik sambodan 58 keli salmaq dárejesinde qatardaǵy Arman Turymbetov («Batys» óńirlik qolbasshylyǵy) jeńiske jetti. Al 64 keli salmaq boıynsha efreıtor Málik Baısultanov («Ortalyq» óńirlik qolbasshylyǵy), 88 keli salmaqta qatardaǵy Álı Násipqalı («Batys» óńirlik qolbasshylyǵy) altyn medaldy qanjyǵalaryna baılady. 

Aıta ketsek, jekelegen nomınatsııalar boıynsha «Eń úzdik tehnıkasy úshin» «Ońtústik» óńirlik qolbasshylyǵynyń balýany qatardaǵy jaýynger Nurasyl Esengeldi, «Jeńiske degen jigeri úshin» qatardaǵy Óserhan Jumaǵul («Ońtústik» óńirlik qolbasshylyǵy), al «Úzdik kúres» nomınatsııasy boıynsha «Batys» óńirlik qolbasshylyǵynyń sportshysy qatardaǵy Azat Qýanov marapattaldy. Sonymen qatar «Ulttyq ulan úzdigi» keýde belgisi týrnırdiń qurmetti qonaǵy Aıdar Ábýovqa jáne jarys jeńimpazy, álem jáne Azııa chempıony qatardaǵy Elaman Qoıshybaevqa tabystaldy.

Sporttyq shara sońynda jeńimpazdar Ulttyq ulan Bas qolbasshysynyń orynbasary general-maıor Baýrjan Abjanovtyń qolynan belbeý, arnaıy Kýbok, dıplom jáne baǵaly syılyqtar ispetti marapattarǵa ıe boldy.