Sportshylar QR Prezıdenti Іs basqarmasyna qarasty aýrýhanada tegin emdele alady

ASTANA. QazAqparat - QR Prezıdenti Іs basqarmasyna (QR PІB) qarasty Medıtsınalyq ortalyǵynyń aýrýhanasy men «Qazaqstan sportshylary odaǵy» respýblıkalyq qoǵamdyq birlestigi yntymaqtastyq týraly memorandýmǵa qol qoıdy. Endi aýrýhananyń sporttyq medıtsına ortalyǵynda otandyq sportshylar konsýltatsııalyq-dıagnostıkalyq jáne hırýrgııalyq qyzmetterdi tegin ala alady, dep habarlaıdy QazAqparat Astana ákimdigi saıtyna silteme jasap.

«Memorandým bizdiń seriktestigimizdi nyǵaıta túsedi. Mine, osy yntymaqtastyqtyń paıdasyn kórsetetin birneshe negizgi tarmaq bar: mamandandyrylǵan medıtsınalyq qyzmetter kórsetý, jeke tásil, jaraqattanýdyń aldyn alý, sporttyq áleýetti ońtaılandyrý», - dedi QR PІB MO aýrýhanasynyń sporttyq medıtsına ortalyǵynyń basshysy Asqar Baımuhametov.

Óz kezeginde «Qazaqstan sportshylary odaǵy» RQB tóraǵasy Azamat Qarlyǵashev burynǵy jáne qazirgi sportshylarǵa kómek kórsetkeni úshin QR PІB MO aýrýhanasynyń basshylyǵyna alǵys bildirdi.

«Sportshylarymyz ben sport ardagerleri endi sapaly medıtsınalyq kómek ala alatynyna qýanyshtymyn. Elimizde sportshylar sapaly ári óte qajetti medıtsınalyq kómekke júgine almaı jatady. Densaýlyq – bizdiń basty kapıtalymyz, onsyz sportshy karerasyn ary qaraı jalǵastyra almaıdy. Al mundaı jaǵdaılar bizde óte kóp kezdesedi», - dedi Azamat Qarlyǵashev.

Bul máseleniń ózektiligin «Qazaqstan sportshylar odaǵy» RQB tóralqa tóraǵasy, Olımpıada chempıony Serik Sápıev te rastady.

«Karerasynyń shyńynda sportty tastap ketken biraz sportshyny bilemin.
Sportshylar úshin mundaı múmkindik jasalǵanyna qýanyshtymyn. Endi sportshylarymyz kásibı jaraqattardyń saldary úshin qoryqpaı, sapaly medıtsınalyq kómek ala otyryp, sportpen shuǵyldanýdy jalǵastyra alady dep úmittenemin», - dep atap ótti ol.

QR PІB Medıtsınalyq ortalyǵy aýrýhanasynyń dırektory Rýstam Albaevtyń aıtýynsha, qazirgi jáne burynǵy sportshylardy emdeý, ońaltý jáne qalpyna keltirý úshin barlyq jaǵdaı jasalǵan.

«Sporttyq medıtsına tek operatsııalar ǵana emes, eń aldymen aldyn alý sharalary. Aýrýhana bazasynda 2023 jyldyń aqpanynda Sporttyq medıtsına ortalyǵy ashyldy.Ortalyq dárigerleri jyl saıyn shetelde biliktiligin arttyrady. Jaqynda dárigerler Ispanııada, Kıron Salıýd aýrýhanasynda úlken lıga fýtbolshylaryna operatsııa jasaıtyn áıgili professor Ramon Kýgattyń qol astynda oqydy. Barlyq ádis-tásilder osynda jetkizildi, belsendi jumys isteýde. Sondaı-aq sporttyq medıtsına ortalyǵynda sportshylar keńes alyp, operatsııa jasatyp qana qoımaı, Qazaqstannyń kez kelgen azamaty TMKKK jáne MÁMS sheńberinde osy qyzmetterdi ala alatynyn atap ótkim keledi», - dedi Rýstam Álbaev.