Sportqa kelip jatqan jastar kóp-boksshy

QYZYLORDA. QazAqparat - Elbasy Joldaýyna Syr jurtshylyǵy úlken qoldaý bildirip otyr. Solardyń biri - bokstan QR eńbek sińirgen sport sheberi, Álem chempıonatynyń kúmis júldegeri Qamshybek Qońqabaev mańyzdy qujatta elimizdiń bolashaǵy úshin kóptegen mańyzdy máseleler qamtylǵany týraly QazAqparat tilshisine aıtyp berdi.

«Memleket basshysy Nursultan Nazarbaev «Qazaqstandyqtardyń ál-aýqatynyń ósýi: Tabys pen turmys sapasyn arttyrý» taqyrybyndaǵy Joldaýynda kóptegen máseleler qamtyldy. Atap aıtqanda, ekonomıkada básekelestikti damytý, bıznesti zańsyz ákimshilik qysymnan  jáne qylmystyq qýdalaý qaýpinen qorǵaýdy arttyrý, eksportqa baǵyttalǵan ındýstrııalandyrý máselesin ekonomıkalyq saıasattyń negizgi elementi retinde sanaý jáne ózge de máseleler jóninde keńinen toqtalyp ótti», - dedi ol.

Sondaı-aq, Qamshybek Qońqabaev QR Prezıdenti jyl saıynǵy Joldaýlarynda dene shynyqtyrý men sport salasyn nazardan tys qaldyryp júrmegenin atady.

«Sport - jarqyn bolashaq kepili. Qazaqstan sporty jyl saıyn qaryshtap damyp keledi. Osynyń arqasynda biz - sportshylar joǵary jetistikterge qol jetkizip júrmiz. Kóptegen sport nysandary salynyp, sportqa kelip jatqan jastardyń sany artýda, - dedi Q. Qońqabaev.

Aıta keteıik, Qyzylorda oblysynda sport nysandaryna halyqtyń qoljetimdiligin arttyrý maqsatynda bıyl 7 eldi mekende sport keshenderi paıdalanýǵa berildi.