Sport jetistikteri jaıynda kórkem fılmderdi túsirý qajet - Mádenıet jáne sport mınıstri

ASTANA. QazAqparat - Anımatsııalyq fılmderge aıryqsha mán berý kerek. Bul týraly búgin Mádenıet jáne sport mınıstrliginiń keńeıtilgen alqa májilisinde osy vedomstvonyń basshysy Arystanbek Muhamedıuly málim etti.

«Jaqynda Elbasy kıno ónerin damytý boıynsha naqty tapsyrmalar berdi. Atap aıtqanda, qazaqtyń tarıhyn baıandaıtyn kóptegen kórkem dúnıelerdi shyǵarýymyz kerek. Mysaly Qazaq handyǵy týraly týyndylar kerek. Nege biz jońǵarlarmen soǵysty ǵana kórsete beremiz. Basqa da jetistikter barshylyq»,-dedi ol.

Mınıstrdiń paıymdaýynsha, kıno týyndylarda osyndaı alyp jerdi saqtap qalǵan ata-babalar jaıynda jáne ǵylymı tulǵalardy qamtý kerek. Osy oraıda Júsip Balasaǵun, ál-Farabı jáne ózge de tulǵalardyń jetistikterin kórsetý mańyzdy.

Mınıstr sport jetistikteri jaıynda kórkem fılmderdi túsirý qajettiligin qadap aıtty.

Anımatsııa salasyna erekshe mán berý kerektigine toqtalǵan vedomstvo basshysy, «Mysaly «Dısneı» mýltfılderden bastaǵan bolatyn. Qazirgi kezde ol úlken oıyn-saýyq ındýstrııasy ortalyǵyna aınaldy. Barlyq jege barsańyz «Dısneılend» ónimderin kóresizder. Beıjiń Olımpıadasyna toqtalatyn bolsaq, «Kýng-fý Panda» bir olımpıadanyń ǵana sımvoly emes, sonymen qatar tutas bir eldiń sımvolyna aınaldy. Sol sebepti biz anımatsııa salasyna barshamyz bolyp erekshe kóńil bólýimiz mańyzdy»,-dedi ol.

«Qazirgi kezde bizdiń ataqty «Altyn adam» týraly ne derekti fılm nemese kórkem jáne anımatsııalyq fılmder joq. Osyndaı tarıhı oqıǵalardy tek Qazaqstanda ǵana emes, barsha álemge pash etýimiz qajet»,-dedi A. Muhamedıuly.