Sport kúni: Astanada qandaı is-sharalar uıymdastyrylmaq

ASTANA. QazAqparat – Astana qalasy Dene shynyqtyrý jáne sport basqarmasynyń basshysy Samat Jylqybaev elordada Sport kúni aıasynda uıymdastyrylatyn is-sharalar jaıynda aıtyp berdi, dep habarlaıdy QazAqparat tilshisi.

«Jyl saıyn tamyzdyń úshinshi jeksenbisi Qazaqstanda Sport kúni atalyp ótedi. Bıyl bul data 20 tamyzǵa sáıkes kelip otyr. Qazaqstanda sportty damytý jolynda buqaralyq sport qozǵalysynyń aýqymyn keńeıtýge jáne sport jetistikteri úshin yntalandyrýǵa baǵyttalǵan memlekettik saıasattyń yqpaly zor.

Sport kúnine oraı 15 tamyz kúni Qazaqstan sport kesheninde saltanatty is-shara ótedi.

18 tamyz kúni qala ákimdi múmkindigi shekteýli adamdardy tasymaldaýǵa arnalǵan arnaıy jabdyqtalǵan Toyota Hience atvokóligin tabystaıdy», - dedi S. Jylqybaev Astana qalasy kommýnıkatsııalar qyzmetindegi baspasóz máslıhatynda.

Sonymen qatar Baıqońyr, Esil, Almaty jáne Saryarqa aýdanynyń kishkentaı turǵyndary arasynda sport kúnine arnalǵan «Kóńildi start» is-sharasy uıymdastyrylmaq.

Al Esil aýdany mekemeleriniń qyzmetkerleri arasynda ústel tennısinen týrnır ótkizý josparlanyp otyr.

«21-25 tamyz aralyǵynda Jaqsylyq Úshkempirov atyndaǵy Jekpe-jek saraıynda djıý-djıtsýdan jasóspirimder men kadetter (U14- U21) arasyndaǵy álem chempıonaty ótedi. Bıylǵy básekege 42 elden 1200-den astam sportshy keledi. Onyń ishinde otandastarymyzdyń sany – 194», - dedi basqarma basshysy.

Budan buryn habarlanǵandaı, Astana sportshylary jyl basynan 4 myńnan astam medal jeńip alǵan.