Sport federatsııalarynyń jaýapkershiligin kúsheıtý kerek – Eraly Toǵjanov
«Akkredıttelgen sport federatsııalarynyń jaýapkershiligin kúsheıtý kerek. Memlekettik tapsyrys aıasynda 2018 jyldan 2021 jylǵa deıin Ulttyq Olımpıada komıteti men federatsııalarǵa 65 mlrd teńge bólindi. Biraq, sporttyń kóptegen túrinen oń dınamıka joq. Federatsııalar qyzmetin baǵalaýdyń naqty krıterııleri bolmaýy saldarynan qarajat tıimsiz jaratylyp jatqan sııaqty. Bul búgingi kúni jumys isteýimiz qajetti eń mańyzdy máselelerdiń biri», - dedi Eraly Toǵjanov Mádenıet jáne sport mınıstrliginiń keńeıtilgen alqa otyrysynda.
Sonymen qatar vıtse-premer federatsııalardy memlekettik qarjylandyrý kólemi endigi ýaqytta qalaı aıqyndalýy tıistigine qatysty oıymen bólisti. Federatsııalar basshylarynyń jaýapkershiligi tómen ekendigin de basa aıtty.
«Osyǵan oraı árbir olımpıadalyq tsıklge arnalǵan memorandýmdardy federatsııalarmen rásimdeý tájirıbesin engizýdi tapsyramyn. Osy jyldan bastap federatsııalardy memlekettik qarjylandyrý kólemi olardyń nátıjeleleri men qyzmetterine baılanysty aıqyndalýy tıis», - dedi Úkimet basshysynyń orynbasary.