Sport bolǵan soń jeńilis te, jeńis te bolady - boksshy Karına Ibragımovanyń anasy

<p>KÓKShETAÝ. KAZINFORM &ndash; Parıj Olımpıadasynda bokstan qyzdar arasynda synǵa túsken aqmolalyq Karına Ibragımovanyń anasy Irına Vladımırovna qyzyna qoldaý bildirdi.</p>

Anasynyń aıtýynsha, Karına kishkentaıynan sportqa áýes bolyp ósken. 

«Alǵash ret bokspen 10-12 jasynan aınalysa bastady. Bastapqyda kıkbosıng úıirmesine bardy, keıin onyń olımpıada sport túrine jatpaıtynyn bilgen soń, ákesiniń aqylymen bokspen aınalysýdy sheshti. Sodan beri respýblıkalyq jáne halyqaralyq jarystarǵa úzbeı qatysyp keledi», - dedi boksshynyń anasy Irına Vladımırovna.

Anasynyń aıtýynsha, Olımpıada oıyndaryna qatysý Karınanyń balalyq armany bolǵan.

«Men ózim Karınanyń birde bir jekpe-jegin telearnadan qaraǵan emespin. Biraq ishteı analyq aq tilegimdi aıtyp, duǵa etip otyramyn. Únemi teledıdardyń aldynda ákesi jankúıer bolyp, tamashalaıdy. Ol Karınanyń birde bir jekpe jegin jibergen emes. Karınaǵa keletin bolsaq, ol bul Olımpıadany uzaq kútti, tórt jylda bir ret ótetin dodaǵa qatysý onyń armany edi. Lıtsenzııaǵa qoly jetkende otbasymyzben birge qýandyq. Ol kezde de qarsylastary myqty boldy, soǵan qaramastan birinshi múmkindikten lıtsenzııany jeńip aldy. Bul joly qarsylastary osal bolmaıtyny báseden belgili edi. «Baq shaba ma, bap shaba ma» degendeı, ózderińiz kórip otyrǵandaı, bul joly Karınanyń joly bolmady. Sport bolǵan soń jeńilis te, jeńis te bolyp turady», - dedi túıindedi Irına Vladımırovna.

Sonymen birge, sportshynyń anasy qyzyna únemi qoldaý bilidirip kele jatqan azamattarǵa jáne jattyqtyrýshylaryna alǵysyn bildirdi.

Aıta ketsek, 28 jastaǵy Karına Ibragımova álem chempıonatynyń úsh dúrkin júldegeri: 2023 jyldary «kúmis» júldeger atansa, 2018 jáne 2022 jyldary «qola» medal aldy. Sondaı-aq, 2022 jyly Karına Ibragımova Azııa chempıony jáne jazǵy Azııa oıyndarynyń kúmis júldegeri atandy. Olımpıadadaǵy alǵashqy qarsylasyna keletin bolsaq, 33 jastaǵy Eshlıon Losada Motta – 2023 jylǵy Panamerıkalyq oıyndardyń qola júldegeri. Qola medalmen Losada Motta Olımpıada oıyndaryna joldama alǵan alǵashqy Pýerto-Rıko boksshysy.

Tartysty ótken kezdesýde Karına Ibragımova qarsylasynan utylyp, shırek fınalǵa shyǵa almady.

Eske salaıyq, Karına Ibragımovanyń jekpe-jegi tikeleı efırde Kókshetaýdyń ortalyq alańynda kórsetiletinin jazǵan edik.