Sozaqtyń tabıǵaty túıe sharýashylyǵyn damytýǵa qolaıly - Ómirzaq Shókeev
Oblys ákimi Ómirzaq Shókeev Sozaq aýdanynda tórt túliktiń tóresi - túıeni kóbeıtýdi kózdep, ishki naryqty tutastaı qamtýdy mindettedi. Oısyl qara tuqymymen ózge óńirlermen básekeles bolatyndaı qaýqary bar aýdanǵa osy kásipti myqtap qolǵa alýdy tapsyrdy. Bul týraly Sozaq aýdany ákimi Salyhan Polatovtyń esebinde aıtyldy. Aýdan ákimi ótken jyly atqarylǵan jumystar men sheshýdi qajet etetin máselelerdi ortaǵa saldy.
Aýdanda 400 myńǵa jýyq mal basy ósirilýde. 2018 jylmen salystyrǵanda múıizdi iri qara, jylqy men túıe sany ósken. Oblys basshysy Sozaq aýdanynda túıe sharýashylyǵyn damytýǵa qatysty birqatar mindetter júktedi.
«Túıe sharýashylyǵyn damytýǵa aýdannyń tabıǵaty qolaıly, sondyqtan osy kásipti myqtap qolǵa alý kerek. Bul máseleni durys jolǵa qoıyp, ishki naryqty qamtýǵa qaýqar jetedi dep oılaımyn», - dedi Ómirzaq Estaıuly.
2019 jyly Sozaq aýdany jergilikti bıýdjetke 6 mlrd. teńge qarjy túsirip, jospardy artyǵymen oryndaǵan. Aýdan ekonomıkasyna ótken jyldarmen salystyrǵanda tartylǵan ınvestıtsııa kólemi 125%-ǵa artyp otyr. Údemeli ındýstrıaldy ınnovatsııalyq damý memlekettik baǵdarlamasy aıasynda óńirlik kásipkerlik qoldaý kartasy tizimine 6 jańa joba engizilgen.
Sholaqqorǵan aýylynan 120 ga jerge jobalyq quny 50 mln. AQSh dollaryn quraıtyn «ıÝKSES-50» JShS kún elektr stansasynyń qurylysy aıaqtalǵan. Aldaǵy ýaqytta onda turaqty jumys oryndary ashylady. Ótken jyly aýdanda birneshe jańa mektep ashylǵan. Jańa magıstraldy gaz qubyrynyń qurylysy men aýyz sýmen jabdyqtaý jumystary bastalǵan. 2 saıabaq salynyp, 20 shaqyrym jol asfalttalǵan. «Qamqorlyq» jobasy aıasynda turmys taýqymetin tartqan 30 otbasyn baspanamen qamtý kózdelip otyr.
Jıyn sońynda Ómirzaq Shókeev aýdan azamattaryn qabyldady. Sozaq aýdanynyń turǵyny Qabylbek Espenbetov Sholaqqorǵan aýylynyń ishki júıesin gazben jabdyqtaý máselesi men joldarǵa asfalt tóseý jumystarynyń jalǵasýy boıynsha ótinishin aıtyp keldi. Ómirzaq Estaıuly bul máselelerdiń júzege asýyn óz baqylaýyna aldy.