Sozaqta soǵys ardagerlerine avtokólikter syıǵa tartyldy

ShYMKENT. QazAqparat  - Ońtústik Qazaqstan oblysy, Sozaq aýdanynda  Jeńis kúni merekesi joǵary deńgeıde atap ótildi.  Aýdan jurtshylyǵy «Belgisiz sarbaz» eskertkishine gúl shoqtaryn qoıyp, árýaqtarǵa quran baǵyshtady, dep habarlaıdy  QazAqparat tilshisi.

Merekelik sharada aýdan ákimi Salyhan Polatov 6 soǵys ardagerine  sý jańa avtokólikterdiń kiltin tabystady. Odan bólek, maıdangerlerge ýran óndiretin «Katko», «Inkaı» kompanııalary qarjylaı syılyqtar usyndy.  Mereke kúnderi  tyl jáne aýǵan soǵysy ardagerlerine, Chernobyl apatyna qatysýshylarǵa da aýdandyq bıýdjetten qarjylaı syılyqtar tapsyryldy. Merekelik shara ortalyq ıppodromda báıge, kókpar, qyz qýý syndy ulttyq sport túrlerimen jalǵasty.

Aıta keteıik, atalǵan aýdannan maıdanǵa 6 myńdaı azamat attansa, olardyń  83 paıyzǵa jýyǵy maıdan dalasynda qaza tapty. Búgingi tańda kózi tiri  6 soǵys ardageri beıbit zamanda ómir súrip jatyr.