Sozaq turǵynyn pyshaqtaǵan polıtseıdiń isi Bas prokýratýranyń baqylaýynda

ASTANA. QazAqparat - Ońtústik Qazaqstan oblysynda mas kúıinde jergilikti turǵynnyń úıine basa-kóktep kirgen Sozaq aýdandyq ishki ister bólimi basshysynyń orynbasary Oljas Amandyqovqa qatysty qylmystyq is boıynsha sotqa deıingi tergeý amaldary bastaldy, dep habarlaıdy QazAqparat tilshisi.

«OQO Sozaq aýdanyndaǵy ІІB basshysynyń orynbasaryna qatysty QR Qylmystyq kodeksiniń 149-baby («Turǵynjaıǵa qolsuǵylmaýshylyqty buzý») jáne jedel-tergeý tobynyń oqıǵa ornyna jiberilmeýine baılanysty 362-baby («Laýazymdyq ókilettikterdi asyra paıdalaný») boıynsha sotqa deıingi tergeý amaldary júrip jatyr.», - dep jazdy QR Bas prokýrorynyń aǵa kómekshisi Dýman Qojahmetov óziniń Facebook-tegi paraqshasyna.

Onyń habarlaýynsha, negizgi qylmys («Turǵynjaıǵa qolsuǵylmaýshylyqty buzý») qyzmettik jumysymen baılanysty emes jáne turmystyq sıpatqa ıe. Sol sebepti oblys prokýrory isti tergeýdi arnaıy prokýrorǵa emes, Ońtústik Qazaqstan oblysy Іshki ister departamentiniń jeke qaýipsizdik basqarmasyna tapsyrǵan.

«Odan bólek, oqıǵa ornyna baryp turyp, qylmystyń aldyn alýǵa árekettenbegeni úshin jedel-tergeý tobynyń múshelerine qatysty QR QK 370-baby («Qyzmettegi áreketsizdik») boıynsha bólek sotqa deıingi tergeý jumysy bastaldy», - dep atap ótti Bas prokýrordyń aǵa kómekshisi.

Eki is boıynsha protsessýaldyq prokýror taǵaıyndaldy. D.Qojahmetovtyń dáıegine sáıkes, prokýror tergeýdiń tolyq júrgizilýin, qabyldanǵan is-áreketterdiń durystyǵyn, barlyq qajetti sanktsııalardyń maquldanýyn qadaǵalaıtyn bolady jáne negizdeme boıynsha isti sotqa jiberip, memlekettik aıyptaýǵa qoldaý kórsetedi.

«Tergeý barysyn Bas prokýratýra óz baqylaýyna aldy», - dep habarlady ol.

Eske sala ketsek, buǵan deıin Sozaq aýdandyq ІІB basshysynyń orynbasary Oljas Amandyqovtyń qatysýymen bolǵan vıdeo áleýmettik jelige tarap ketken edi. Onda Marat T.A. esimdi qoldanýshy Ońtústik Qazaqstan oblysy Sozaq aýdany Sholaqqorǵan aýylynda bolǵan oqys oqıǵa týraly habarlaǵan. Beınejazbada Oljas Amandyqovtyń mas kúıinde jeke úı aýlasyna basa-kóktep kirgeni, úı qojaıynymen daýlasqany kórsetilgen.

«Úı qojaıyny Elnur Ibragımov tún ishinde mas polıtseımen daýlaspaıtynyn aıtqanda, Oljas Amandyqov úı qojaıynyna pyshaq urdy. Sol sátte olardy ajyratpaq bolǵan Elnurdyń qaryndasyn da polıtseı pyshaqpen jaralady (...) Onyń ústine, Oljas Amandyqov oqıǵa ornyna kelgen polıtsııa ekıpajyn balaǵattap, qaıtýdy buıyrǵan. Osylaısha, Ibragımovtar úıindegi aıqaı-shý jarty saǵatqa sozyldy», - dep jazdy Marat T.A.