Sovethan Ǵabbasov: Qazir ulttyq ıdeologııaǵa basa mán berý kerek

NUR-SULTAN. QazAqparat – Ulttyq ıdeologııa jasalmaı ulttyq máselelerdi sheshý múmkin emes. Professor, jazýshy, medıtsına jáne pedagogıka ǵylymdarynyń doktory Sovethan Ǵabbasov otbasy ınstıtýtyn damytý máselesine qatysty osyndaı pikir bildirdi, dep habarlaıdy QazAqparat tilshisi.

«Búgin kóterilip otyrǵan másele boıynsha naqty usynystardy aıtqym keledi. Ol – qoǵamdy jóndep, adamdy túzeý úshin ıdeologııaǵa mán berý kerek. Úsh júz jyldyq bodandyq pen 70 jyldyq ateıstik qoǵamnan óttik. Ulttyq ıdeologııa jasalmaı ulttyq máselelerdi sheshý múmkin emes. Sondyqtan ulttyq ıdeologııanyń mazmunyna basa mán berý kerek», - dedi Sovethan Ǵabbasov «Otbasy kúni» aıasynda ulttyq tárbıe berý men otbasy qundylyqtaryn damytý máseleleri talqylanǵan «dóńgelek ústel» barysynda.

Professordyń aıtýynsha, halyqtyń baılyǵy da, tilegi de – urpaǵy. Urpaq tárbıesine qazir qazaq qana emes, búkil álem halqy basa nazar aýdaryp otyr.

«Adamzatty tán-tárbıesinen basqa urpaqqa eshteńe bere almaı tur. Adamnyń máni janynda. Ulttyq ıdeologııa jasalmaı memleket te bolmaıdy. Ulttyq ıdeologııasyz memleket – muhıtta eskeksiz júrgen qaıyq ispettes. Onyń soǵylar jeri – jaǵadaǵy jartas. Mine qazir urpaǵymyzben osy jartasqa soǵylyp jatqan halyqtyń birimiz. Sondyqtan eń birinshi búgingideı jıynnyń, talqylaýdyń ótkizilip otyrǵanyna alǵys aıtamyn», - degen ol ulttyq ıdeologııanyń qurylymyn qalyptastyrýǵa atsalysýǵa daıyn ekenin málim etti.

Foto: tilalemi.kz