Sottarǵa qurmetpen qaraýdy qalyptastyrýdyń quqyqtyq tetikterin zerdeleý qajet - Q.Mámı

ASTANA. QazAqparat - Sottarǵa qurmetpen qaraýdy qalyptastyrýdyń quqyqtyq tetikterin zerdeleý qajet. Bul týraly búgin 2017 jyldyń 1 jartyjyldyǵynda sot tóreligin júzege asyrý qorytyndylaryna arnalǵan respýblıka sýdıalarynyń keńeıtilgen otyrysynda QR Joǵarǵy sotynyń tóraǵasy Qaırat Mámı aıtty, dep habarlaıdy QazAqparat.

«Búgingi kúni Qazaqstanda sot tóreligi barynsha qoljetimdi. Elektrondy sot óndirisi de keńinen engizilýde. Sottarmen talaptardyń 95 paıyzǵa jýyǵy qanaǵattandyrylady. Buǵan qosa, birinshi satydaǵy sot sheshimine nebári 8 paıyzy ǵana shaǵymdanady. Sot protsesine qatysatyn qalǵan 92 paıyzyn sottardyń sheshimi qanaǵattandyrady. Mine, sondyqtan da sońǵy jyldardaǵy áleýmettik zertteýlerdiń nátıjeleri sot protsesine qatysýshylardyń sot sheshimine qanaǵatanýynyń joǵary deńgeıin kórsetip otyr. Degenmen qoǵamnyń synı kózqaraspen qaraıtyn toby da bolady», - dedi Qaırat Mámı.

Osy rette Joǵary sot tóraǵasy sottarǵa qatysty negatıvızm sebepteri olardyń, sonymen qatar syrtqy ortanyń qatelikteri bolyp otyrǵandyǵyn atap ótti.

«Sottarǵa qatysty, ıaǵnı ishki faktorlarǵa qatysty aıtarym, tártiptik tájirıbeni qatańdatý jáne sýdıalar ózderiniń kásibı deńgeılerin únemi kóterip otyrýy qajet dep sanaımyn. Shynaıy túrde, kún saıyn sýdıa bedeli úshin kúres kerek. Al syrtqy faktorlarǵa qatysty sot júıesi qyzmetin talqylaýdyń halyqaralyq tájirıbe jáne sottarǵa qurmetpen qaraýdy qalyptastyrýdyń ózge de quqyqtyq tetikteri bar. Departamentke bul tájirıbeni zerdelep, usynys engizýdi tapsyramyn», - dedi ol.