Sottardyń sheteldikterdi elden shyǵarý týraly sheshimderi 4 esege artyq boldy

ASTANA. QazAqparat - 2015 jyldyń 1 qańtarynan bastap Qazaqstan Respýblıkasynda Ákimshilik quqyq buzýshylyqtar týraly jańa kodeks qoldanysqa engizildi. Ony qoldaný aıasynda elimizde 3 226 291 ákimshilik quqyq buzýshylyq tirkelip, bul 2014 jyldyń uqsas kezeńimen salystyrǵanda 25 paıyzǵa artyq boldy.

«Ákimshilik praktıka sýbektileri aıyppul salý týraly 10 paıyzǵa artyq qaýly (2 256 873), 30 paıyzǵa - eskertý (527 136) shyǵarǵan, sonymen qatar sottar sheteldikterdi ákimshilik turǵyda elden shyǵarý týraly 4 esege artyq (8 386) sheshim shyǵarǵan kórinedi»,- delingen QR Bas prokýratýrasy Quqyqtyq statıstıka jáne arnaıy esepke alý jónindegi komıtettiń málimetinde.

Sonymen qatar, birqatar áreketterdiń qylmystyq teris qylyq dárejesine aýysýyna baılanysty, ákimshilik qaýmaýǵa alýǵa tartylǵan adamdardyń 15 paıyzǵa azaǵany baıqalady.

Komıtet málimetine qaraǵanda, ákimshilik aıyppuldardyń óndirilýi 52 paıyzdy qurady. Aǵymdaǵy jyly salynǵan 42 mlrd. teńge ákimshilik aıyppuldan 21,7 mlrd. teńge óndirildi. Sonymen qatar ústimizdegi jyly ótken jyldardyń aıyppuldary boıynsha 6 mlrd. teńgeden astam somaǵa 68 myń qaýly oryndaldy.

Aımaqtar bóligindegi eń kóp óndirý Astana qalasy (84%), Mańǵystaý (76%), Batys Qazaqstan (64%) jáne Ońtústik Qazaqstan (56%) oblystarynda belgilendi. Aıyppuldardy jınaýdyń eń tómengi kórsetkishi Pavlodar oblysynda (35%)jáne Almaty qalasynda (38%)baıqalady.

Aıta keteıik, anyqtalǵan usaq quqyq buzýshylyqtardyń sany 46 paıyzǵa artqan, ıaǵnı osyndaı 1 560 257 áreket tirkeldi.