Sottardyń áreketterine baǵa berýde asyra silteý kezdesedi – sot jıýrıi

NUR-SULTAN. QazAqparat – Joǵarǵy sottyń sýdıasy Aqyltaı Qasymov sot jıýrıleriniń jumystary týraly aıtyp berdi, dep habarlaıdy QazAqparat tilshisi.

«2019 jyldyń 7 aıynyń ishinde 2018 jylmen salystyǵanda 30 is artyq qaralǵan. Sol sebepti, árbir úshinshi tártiptik óndiris ártúrli negizder boıynsha toqtatyldy», - dedi Aqyltaı Qasymov 2019 jyldyń qorytyndysy boıynsha qazaqstandyq sottardyń keńeıtilgen otyrysynda.

Ol sondaı-aq keıbir isterdiń toqtatylýyna qatysty pikirin bildirdi.

«Zańdy negizi bolmasa da oblystyq sottardyń sot jıýrılerine materıaldardy joldaý jaǵdaılary bar. Al negizinen Konstıtýtsııalyq zańdarda tártiptik jaýapkershiliktiń tizimi qamtylǵan», - deıdi sýdıa.

Onyń aıtýynsha, oblystyq sottardyń jalpy otyrysynda sýdıalardyń jaýapkershiligin ýaqtyly qaramaý, sot jıýrılerine materıaldardy joldaý merzimin sozý jaǵdaılary kezdesedi. Aqyltaı Qasymov bul jaǵdaılar oblystyq sottardyń tóraǵalary tarapynan mindettemelerdiń durys oryndalmaı jatqanyn kórsetetinin tilge tıek etti. Sondaı-aq, Joǵarǵy sottyń sýdıasy keıbir isterge burys quqyqtyq sıpattama beriletinin de aıtady.

«Oblystyq sottardyń tóraǵalary ózinen tómen turǵan sottardyń áreketterine quqyqtyq baǵa berýde asyra siltep jiberetin boldy. Jaı sózben aıtqanda, appelıatsııa kassatsııasy osy iske mán berip, zań talaptaryn ekinshi orynǵa ysyrdy. Respýblıka boıynsha osy baǵytta 471 qaýly shyqqan. Bulaı kete bersek, bizde óreskel buzýshylyǵy joq sýdıa qalmaı qalady», - dedi spıker.