Sottar óz sot aktilerinde Konstıtýtsııany qoldanady- Rýslan Báıishev

ALMATY. QazAqparat - Sýdıalar Konstıtýtsııaǵa qyzmet etedi. Mundaı pikirdi Óńirlik kommýnıkatsııalar qyzmeti alańynda Almaty qalalyq sotynyń sýdıasy Rýslan Báıishev aıtty, dep habarlaıdy QazAqparat tilshisi.

Spıkerdiń sózinshe, Qazaqstanda júrgizilgen reformalar men referendýmdar sot qyzmeti úshin sapaly qadam bolmaq. Sýdıalar Konstıtýtsııaǵa qyzmet etedi. Qazirgi ýaqytta sot júıesi azamattardyń quqyǵyn, memlekettik múddeniń qoǵamdyq jáne ekonomıkalyq negizderin qorǵaıdy. Bul jerde Konstıtýtsııa mańyzdy ról atqarady.

«Ata Zań bizdiń elimizdiń aýmaǵynda tikeleı qoldanylady, sottar Konstıtýtsııany ózderiniń sot aktilerinde qoldanady jáne oǵan tikeleı silteme jasaıdy», - dep jalǵastyrdy sýdıa.

Ol sondaı-aq eldiń Ata Zańyna ózgerister men tolyqtyrýlar engizilgenge deıin Konstıtýtsııalyq Keńes jumys istegenin, ol negizgi zań normalaryn túsindiretin organ bolǵanyn málim etti.

«Ózgeristerden keıin Konstıtýtsııalyq sot qurylady, ol álemdik standarttarǵa sáıkes azamattarymyzǵa Konstıtýtsııa normalaryn tikeleı, tolyq túsindirýge, quqyqtaryn qorǵaýǵa kepildik beredi. Qazaqstan - postkeńestik keńistikte quqyqtyq, ekonomıkalyq jáne áleýmettik júıeni jańǵyrtý boıynsha kóshbasshy el. Bizdi Reseı Federatsııasy aqparattyq tehnologııalardy, elektrondyq úkimetti damytý boıynsha ozyq memleket retinde úlgi etip otyr», - dep atap ótti Rýslan Báıishev.

Jýrnalısterdiń suraǵyna jaýap bere otyryp, Almaty sýdıasy Qazaqstan Konstıtýtsııasy memlekettiliktiń kepili, tiregi jáne irgetasy dep atap ótti.

Sottar óz kezeginde azamattardyń quqyqtaryn qorǵaýdy qamtamasyz etýdi jalǵastyrady.

«Konstıtýtsııany damytýdyń jańa kezeńi Memleket basshysynyń, búkil qoǵamnyń alǵa qoıǵan mindetterine qol jetkizetinine senimdimin. Sot júıesi bizdiń azamattarymyzdyń barlyq suranystaryn oryndaýǵa tyrysady», - dep tolyqtyrdy spıker.

Brıfıng sońynda Rýslan Báıishev almatylyqtar men el turǵyndaryn kele jatqan Konstıtýtsııa kúnimen quttyqtady.