Sottan tys bankrottyq: Ótinish berýshi qandaı krıterıılerge saı bolýy kerek

<p>ASTANA. KAZINFORM &ndash; Memlekettik kirister komıteti tóraǵasynyń orynbasary Seıiljan Ahmetov azamattar sottan tys bankrottyq rásiminen ótý úshin qandaı sharttar baryn aıtty.</p>

Qazaqstan Respýblıkasy azamattarynyń tólem qabilettiligin qalpyna keltirý jáne bankrottyǵy týraly» Zańynda qaryz túri jáne qaryz somasyna baılanysty 3 rásim qarastyrylǵan (sottan tys bankrottyǵy, tólem qabilettiligin qalpyna keltirý jáne sot bankrottyǵy rásimderi).

Olardyń ishindegi eń suranysy kóp - sottan tys bankrottyq rásimi, ony tek bankter, mıkroqarjy uıymdary jáne kollektorlyq agenttikter aldyndaǵy qaryzdar boıynsha qoldanýǵa bolady.

«Sottan tys bankrottyq rásiminiń negizgi sharttary mynaý:

1) bereshek 5,9 mln teńgeden (1600 AEK) aspaýy kerek;

2) 12 aı ishinde óteý bolmaǵan bolýy kerek;

3) tirkelgen múlik, onyń ishinde ortaq menshiktegi múlik bolmaýy kerek;

4) bankpen retteý júrgizilgen bolýy tıis», - dedi OKQ alańynda ótken baspasóz máslıhatynda Seıiljan Ahmetov.

Sondaı-aq, vedomstvo ókili buǵan qosa arnaıy sharttar baryn da atap ótti.

«Ataýly áleýmettik kómek alýshylar úshin 12 aı ishinde tólemeý krıterıi qoldanylmaıdy. Bes jyldan astam ýaqyt bereshegi ótelmegen tulǵalar úshin múliktiń bolýyn tekserý jáne qaryz somasyna shekteýler belgilenbeıdi», - dedi spıker.

Azamattar bul rásimge ótinishterdi halyqqa qyzmet kórsetý ortalyqtarynda elektrondy úkimet portaly (eGov.kz.), sondaı-aq e-Salyq Azamat nemese eGov mobıldi qosymshasy arqyly bere alady.

Aıta keteıik, 2023 jyldyń 3 naýryzynda elimizde jeke tulǵalardyń bankrottyǵyn rásimdeýge ótinish qabyldaý bastaldy.

Sodan beri elimizde 17,9 myń azamat bankrot dep tanylǵany týraly jazǵan edik.

Sondaı-aq, jeke tulǵalardyń bankrottyǵy týraly jańa «Qoldaý» aqparattyq júıesi iske qosyldy.