Sottalǵandardyń jumys tappaı, qoǵamǵa qaıta beıimdele almaýyna ne sebep
«Bas bostandyǵynan aıyrylyp, jazasyn ótep shyqqandar jumysqa ornalasýda qıyndyqtarǵa tap bolady. Osy oraıda olardy eńbekpen qamtýda yntalandyrý júıesin engizý usynylady. Atap aıtqanda, salyq rejımi boıynsha jeńildikter jasaý. Sottalǵandardyń jumysqa ornalasýyna kedergi keltiretin taǵy bir problema olardyń sozylmaly aýrýlarǵa shaldyǵýy. Turaqty jumysy bolmaǵandyqtan isti bolǵan azamattarǵa eshqandaı tólem jasalmaıdy», - dedi Astana qalasy Polıtsııa departamentiniń jergilikti polıtsııa qyzmeti basqarmasynyń bastyǵy Arman Aıtmaǵambetov elorda máslıhatynda ótken otyrysta.
Onyń aıtýynsha, isti bolǵandardyń mamandandyrylǵan medıtsınalyq kómek alýǵa da quqyǵy joq.
«Olardy emdeý jáne ońaltý máselesin qalalyq densaýlyq saqtaý uıymdary bazasynda iske asyrý usynylady. Odan bólek, atalǵan sanattaǵy azamattardyń jumysqa ornalasýyna sot aýyrtpalyqtary men atqarýshylyq qujattardyń bolmaýy kedergi keltiredi. Bul jaǵdaıda múliktik talaptardy ishinara óteý úshin bank kartalaryn ýaqytsha buǵattan shyǵarý usynylady», - deıdi ol.
Astanalyq polıtsııa ókiliniń málimdeýinshe, buryn isti bolǵandardyń qylmysqa qaıta barmaýy jáne olardy qoǵamǵa beıimdeý barlyq múddeli organdardyń birlesken, júıeli jumysyn talap etedi.