Sottalǵandardyń advokatpen kezdesýine ruqsat etildi – jańa Qaýly

NUR-SULTAN. QazAqparat – Qylmystyq-atqarý júıesi mekemelerinde sottalǵandarǵa advokattarmen (qorǵaýshylarmen) kezdesýge ruqsat etildi. Bul týraly QR bas sanıtarlyq dárigeriniń jańa qaýlysynda aıtylǵan, dep habarlaıdy QazAqparat.

Qujatqa sáıkes, advokatpen (qorǵaýshymen), sondaı-aq shuǵyl tergeý áreketterin júrgizý úshin tergeýshimen jáne advokatpen (qorǵaýshyǵa) kórisýge ruqsat berildi. Bul rette, maska nemese respıratordyń, rezeńke qolǵaptardyń bolýy mindetti. Sondaı-aq tergeý áreketterine qatysýshylar arasynda keminde 2 metr qashyqtyq saqtalýy tıis. Sottalǵandardyń, kúdiktilerdiń jáne aıyptalýshylardyń qatysýymen júrgiziletin ózge is-sharalarǵa shekteý joıylǵan joq.

Eske sala keteıik, buǵan deıin sottalǵandardyń advokattarmen (qorǵaýshylarmen) kezdesýi toqtatylǵan bolatyn. Shuǵyl tergeý áreketterin júrgizý úshin tergeýshimen jáne advokatpen kezdesýge ǵana ruqsat beriletin.

Sonymen qatar, týystarmen uzaqmerzimdi kezdesýlerge ruqsat berildi. Bul jaǵdaıda merzimi 5 táýlikten aspaǵan koronavırýsqa PTR-anyqtama bolýy shart. Vaktsınanyń tolyq kýrsyn alǵandardan PTR-anyqtama talap etilmeıdi. Alaıda, koronavırýsqa qarsy egilgenin rastaıtyn qujat usynylýy qajet.

Sondaı-aq jańa qaýlyǵa sáıkes, Qazaqstanǵa Údistannan kelgen azamattardy 14 kúnge úıde oqshaýlaý kerektigi aıtylǵan.

PTR-testiń 3 táýlikten aspaıtyn teris nátıjesi bar anyqtama nemese COVID-19-ǵa qarsy vaktsınanyń tolyq kýrsyn alǵanyn rastaıtyn qujat usynylǵan jaǵdaıda, bosaný kezinde seriktes bolýǵa ruqsat berildi.