Sottalǵandardy emdeýmen endi Densaýlyq saqtaý mınıstrligi aınalysady

ASTANA. QazAqparat – Elimizde túrmede jazasyn ótep jatqandardy medıtsınalyq kómekpen qamtý tolyqtaı Densaýlyq saqtaý mınıstrliginiń quzyretine berildi. Bul týraly Іshki ister mınıstrligi ótkizgen brıfıng barysynda aıtyldy, dep habarlaıdy QazAqparat tilshisi.

«Tergeý ızolıatorlary men qylmystyq-atqarý júıesi mekemelerindegi qamaýdaǵy azamattardy medıtsınalyq qamtamasyz etý fýnktsııalary men ókilettikteri Densaýlyq saqtaý mınıstrligine tolyǵymen berildi. Jazasyn óteýshilerdi medıtsınalyq turǵydan qamtýdy atalǵan mınıstrliktiń qaraýyna berý tekserýdiń, dıagnostıkanyń jáne emdeýdiń zamanaýı ádisterine keńirek qol jetkizýge múmkindik beredi. Sonymen qatar medıtsına qyzmetkerleri endi qylmystyq mekeme ákimshiligine baǵynbaıdy, bul bolýy múmkin zańsyz áreketterdiń aldyn alady», - dedi ІM Qylmystyq atqarý júıesi komıtetiniń sanıtarlyq-epıdemıologııalyq qadaǵalaý tobynyń bas mamany, sanıtar dáriger Mádına Tórebaeva vedomstvoda onlaın ótken baspasóz máslıhatynda.

Onyń aıtýynsha, atalǵan mindetti Densaýlyq saqtaý mınıstrliginiń jaýapkershiligine berý eki kezeńnen turdy.

Aldymen ótken jyly 1 shildede 16 tergeý ızolıatory berilse, bıyl 1 qańtarda 64 qylmystyq atqarý mekemesi mınıstrlik quzyretine ótken.

«Qylmystyq atqarý mekemelerin medıtsınalyq qamtamasyz etý osy ýaqytqa deıin resýrstar, sapa jáne qyzmetterdi baqylaý turǵysynan azamattyq sektordyń medıtsınalyq qyzmetimen teń bolmady. Negizgi problema – medıtsınalyq qyzmetkerlerdiń jetispeýshiligi, qylmystyq mekemeleriniń medıtsınalyq qyzmetkerleriniń jalaqysy densaýlyq saqtaýdyń azamattyq sektoryndaǵy qyzmetkerlerge qaraǵanda tómen boldy», - deıdi ol.

Sondaı-aq, ІІM ókiliniń málimdeýinshe, azamattyq medıtsınada aıtarlyqtaı materıaldyq-tehnıkalyq baza men bilikti mamandar bar.

Osylaısha túrmeler men ýaqytsha ustaý ızolıatoryndaǵy jazasyn óteýshilerdi qaraıtyn medıtsına qyzmetkerleriniń shtaty Densaýlyq saqtaý mınıstrligine berildi.