Sottalǵan lańkester týrmedegi áleýmettik ortaǵa yqpal ete bastady

ASTANA. QazAqparat - Lańkester men ekstremıster bas bostandyǵynan aıyrý oryndaryndaǵy áleýmettik ortany túbegeıli ózgertti. Bul týraly búgin lańkestikpen kúres máselelerine arnalǵan halyqaralyq dóńgelek ústelde QR Din isteri jáne azamattyq qoǵam vıtse-mınıstri Berik Aryn málim etti, dep habarlaıdy QazAqparat.

«Mınıstrlik bas bostandyǵynan aıyrý oryndaryndaǵy lańkester men ekstremısterge erekshe kóńil bólgen jón dep sanaıdy. Atalmysh jaǵdaı túzeý mekemelerindegi áleýmettik ortany túbegeıli ózgertti», - dep atap ótti ol.

Vıtse-mınıstrdiń sózinshe, lańkester men ekstremıster óziniń «senimine» berik jáne dástúrli qundylyqtardy moıyndamaıdy. Olar ózderiniń ıdeologııalyq kózqaras júıesin óte qatal qorǵaıdy jáne ózge kózqarastardy qabyldamaıdy. 

«Túrmege túsken kezde olar bul jasaǵan qylmysy úshin qoǵam men memlekettiń bergen jazasy dep sanamaıdy jáne oǵan ókinish bildirmeıdi. Syrtqy aýyrtpalyqtar men bas bostandyǵynan aıyrylý - óz seniminiń bergen synaǵy ǵana dep qabyldaıdy. Sondyqtan kózqarasy turaqsyz ózge azamat túrmege túsken kezde, ol birden radıkaldar úshin ońaı oljaǵa aınalady», - dep atap ótti Berik Aryn.

Onyń aıtýynsha, qazirgi ýaqytta radıkaldardy qaıta qoǵam ómirine beıimdeý, dástúrli kózqarastarǵa bet burǵyzý úshin elimizde túrli ońaltý ortalyqtary jumys jasaýda. Olardyń jáne Bas prokýratýranyń kúshimen túrli ádistemelik quraldar da shyǵarylýda.

El óńirlerindegi túrmelerde radıkaldarmen teologtar arnaıy jumys atqaryp jatyr.

«2015 jyldan bastap, Іshki ister mınıstrligi janyndaǵy qylmystyq-atqarý júıesiniń mekemelerinde Qazaqstannyń dinı basqarmasy ımamdary dinı-aǵartýshylyq jumystar jasaıdy. Osy baǵytta birqatar jaǵymdy nátıjeler bar. Degenmen bul jumys jetildirýdi qajet etetini de jasyryn emes. Vedomstvoaralyq qarym-qatynasty jolǵa qoıý kerek», - dedi vıtse-mınıstr.